جۋرناليست: قازاقتىڭ وزبەكستانعا بارىپ, جۇمىس ىستەۋىنە تۋرا كەلسە تاڭعالمايمىن

فوتو: اشىق دەرەككوز

قازىر وزەكەڭدەر سوعىسقا كەتكەن ورىستاردىڭ ورنىن باسىپ, رەسەي زاۋىتتارىندا ىستەپ جاتىر. ەرتەڭ ەلگە ورالىپ, نەبىر زاۋىتتار اشاتىنىنا كۇمانىم جوق, سەبەبى مەن بىلەتىن وزبەك اعايىن كەز كەلگەن شارۋانى دوڭگەلەتىپ اكەتەدى.

قازاقتار ءالى وزبەكستانعا بارىپ قارا جۇمىس ىستەيتىن كۇنگە جەتەمىز. سەبەبى وزبەكتەر دامىعان ەلدەرگە بەرىپ, جاڭاشىلدىقتى ۇيرەندى. بۇل تۋرالى  جۋرناليست, باسپاگەر شىڭعىس مۇقان پىكىر ءبىلدىردى. ونىڭ پايىمداۋىنشا, وزبەكستاننىڭ پاريج وليمپياداسىندا كورسەتكەن تاريحي ناتيجەسىن ەڭبەكقورلىق پەن ەلدەگى جوعارى باسەكەنىڭ ناتيجەسى, دەپ حابارلايدى qandastar.kz Skifnews.kz اقپارات پورتالىنا سىلتەمە جاساپ.

«وزبەكتەر جارادى. اكەم وزبەكستاندا تۋىپ, سوندا مەكتەپ بىتىرگەن. 30-جىلدارداعى ناۋبەت زاماندا اتالارىمىز اقتوبە جاقتان وزبەكستانعا ءوتىپ كەتكەن. قارى ناعاشىلارىمىز كۇنى كەشەگە دەيىن وزبەكستاندا تۇردى. ءجيى بارىپ تۇردىق.

ورتالىق ازيادا وزىپ العا شىعاتىن ءبىر ۇلت بولسا, وسى وزبەكتەر بولاتىن سياقتى.

نەگە دەيسىز عوي, وزبەك اعايىننىڭ وتە ەڭبەكقور ەكەنى ايتپاسا دا تۇسىنىكتى. تاڭعى 5-6-دا تۇرىپ, جۇمىستى ەسىك الدىن سىپىرۋدان باستايدى. الىسقا بارماي-اق, شىمكەنتتىڭ سايرامىنان ءبىر ءوتىڭىز. وزبەكتەر تۇراتىن كوشە تاپ-تازا, قوقىستار قاپتالعان, كوشەگە دەيىن گۇل مەن جاسىل-جەلەك ەگىپ تاستاعان.ەڭبەكقور  حالىق ۋاقىتتىڭ قادىرىن بىلەتىن سياقتى. ماسەلەن, وزبەك اعايىندار تويدى تاڭعى 7-دە وتكىزەدى. پالاۋ باسادى. قوناقتار جۇمىسقا بارا جاتىپ جولاي كىرىپ شىعادى. ءبىز سياقتى استا-توك ىسىراپ جوق. ءولىم-ءجىتىم بولسا دا سول, ءبىز سياقتى توي داستارحان بولمايدى.

قازاق تەنتىرەگەن جوق دەپ ءتوس قاقتىق. شىنىندا دا وزبەكتەر تەنتىرەپ, وزگە ەلدەرگە بارىپ ەڭبەك ەتتى, سول ەلدەردەن نوۋ-حاۋ ۇيرەندى. ءوز ەلىن داستارحانى ارقىلى تانىستىردى. نيۋ-يوركتىڭ وزىندە وسىدان ءبىراز جىل بۇرىن وزبەكتىڭ ون مەيرامحاناسى بار ەدى.

سپورتشىلار دا بەكەر شىعىپ جاتقان جوق. بۇل جىگىتتەردىڭ كوبى سول اۋىل-ايماقتان شىققاندار. اكە-شەشەسى باسقا وڭىرلەر, ەلدەرگە جۇمىسقا كەتكەندە اتا-اجەنىڭ قاسىندا قالىپ, ءۇيدىڭ شارۋاسىن وزدەرى دوڭگەلەتىپ, اكە-شەشە مەن اعايىن-تۋمانىڭ تەنتىرەپ ەڭبەك ەتىپ جۇرگەنىن كورىپ وسكەندەر. سوندىقتان دا, جاتتىعۋدا دا, جارىستا دا بارىن سالادى. سوڭعى تامشىسى قالعانشا تەر توگەدى. ونىڭ ۇستىنە سانى كوپ حالىق. باسەكەلەستىك جوعارى.

قازىر وزەكەڭدەر سوعىسقا كەتكەن ورىستاردىڭ ورنىن باسىپ, رەسەي زاۋىتتارىندا ىستەپ جاتىر. ەرتەڭ ەلگە ورالىپ, نەبىر زاۋىتتار اشاتىنىنا كۇمانىم جوق, سەبەبى مەن بىلەتىن وزبەك اعايىن كەز كەلگەن شارۋانى دوڭگەلەتىپ اكەتەدى.

«قىرىق جىل بايلىق جوق, قىرىق جىل جارلىلىق جوق» دەگەندەي, ەرتەڭ وزبەكستانعا بارىپ جۇمىس ىستەۋگە تۋرا كەلىپ جاتسا تاڭعالمايمىن. ايتپاقشى, ءبىزدىڭ ەلشىنىڭ ەسەبى بويىنشا, قازىردىڭ وزىندە ءبىراز قازاق ماماندار سوندا ءجۇر ەكەن, ويتكەنى ەكونوميكاسى قارقىندى دامي باستادى», – دەپ جازدى شىڭعىس مۇقان.