Jýrnalıst: Qazaqtyń О́zbekstanǵa baryp, jumys isteýine týra kelse tańǵalmaımyn

Foto: ashyq derekkóz

Qazir ózekeńder soǵysqa ketken orystardyń ornyn basyp, Reseı zaýyttarynda istep jatyr. Erteń elge oralyp, nebir zaýyttar ashatynyna kúmánim joq, sebebi men biletin ózbek aǵaıyn kez kelgen sharýany dóńgeletip áketedi.

Qazaqtar áli О́zbekstanǵa baryp qara jumys isteıtin kúnge jetemiz. Sebebi ózbekter damyǵan elderge berip, jańashyldyqty úırendi. Bul týraly  jýrnalıst, baspager Shyńǵys Muqan pikir bildirdi. Onyń paıymdaýynsha, О́zbekstannyń Parıj Olımpıadasynda kórsetken tarıhı nátıjesin eńbekqorlyq pen eldegi joǵary básekeniń nátıjesi, dep habarlaıdy qandastar.kz Skifnews.kz aqparat portalyna silteme jasap.

«О́zbekter jarady. Ákem О́zbekstanda týyp, sonda mektep bitirgen. 30-jyldardaǵy náýbet zamanda atalarymyz Aqtóbe jaqtan О́zbekstanǵa ótip ketken. Qary naǵashylarymyz kúni keshege deıin О́zbekstanda turdy. Jıi baryp turdyq.

Ortalyq Azııada ozyp alǵa shyǵatyn bir ult bolsa, osy ózbekter bolatyn sııaqty.

Nege deısiz ǵoı, ózbek aǵaıynnyń óte eńbekqor ekeni aıtpasa da túsinikti. Tańǵy 5-6-da turyp, jumysty esik aldyn sypyrýdan bastaıdy. Alysqa barmaı-aq, Shymkenttiń Saıramynan bir ótińiz. О́zbekter turatyn kóshe tap-taza, qoqystar qaptalǵan, kóshege deıin gúl men jasyl-jelek egip tastaǵan.Eńbekqor  halyq ýaqyttyń qadirin biletin sııaqty. Máselen, ózbek aǵaıyndar toıdy tańǵy 7-de ótkizedi. Palaý basady. Qonaqtar jumysqa bara jatyp jolaı kirip shyǵady. Biz sııaqty asta-tók ysyrap joq. О́lim-jitim bolsa da sol, biz sııaqty toı dastarhan bolmaıdy.

Qazaq tentiregen joq dep tós qaqtyq. Shynynda da ózbekter tentirep, ózge elderge baryp eńbek etti, sol elderden noý-haý úırendi. О́z elin dastarhany arqyly tanystyrdy. Nıý-Iorktiń ózinde osydan biraz jyl buryn ózbektiń on meıramhanasy bar edi.

Sportshylar da beker shyǵyp jatqan joq. Bul jigitterdiń kóbi sol aýyl-aımaqtan shyqqandar. Áke-sheshesi basqa óńirler, elderge jumysqa ketkende ata-ájeniń qasynda qalyp, úıdiń sharýasyn ózderi dóńgeletip, áke-sheshe men aǵaıyn-týmanyń tentirep eńbek etip júrgenin kórip óskender. Sondyqtan da, jattyǵýda da, jarysta da baryn salady. Sońǵy tamshysy qalǵansha ter tógedi. Onyń ústine sany kóp halyq. Básekelestik joǵary.

Qazir ózekeńder soǵysqa ketken orystardyń ornyn basyp, Reseı zaýyttarynda istep jatyr. Erteń elge oralyp, nebir zaýyttar ashatynyna kúmánim joq, sebebi men biletin ózbek aǵaıyn kez kelgen sharýany dóńgeletip áketedi.

«Qyryq jyl baılyq joq, qyryq jyl jarlylyq joq» degendeı, erteń О́zbekstanǵa baryp jumys isteýge týra kelip jatsa tańǵalmaımyn. Aıtpaqshy, bizdiń elshiniń esebi boıynsha, qazirdiń ózinde biraz qazaq mamandar sonda júr eken, óıtkeni ekonomıkasy qarqyndy damı bastady», – dep jazdy Shyńǵys Muqan.