12 جاسار قىزدىڭ ىشىندە 7 ايلىق بالا بار: قىزدى اكەسىنىڭ ەكى ءىنىسى كەزەكپەن زورلاپ كەلگەن

فوتو: اشىق دەرەككوز

جاستارى 40-قا تاقاعان جامبىلدىق اعايىندى پەدوفيلدەر التى جىل بويى تۋعان اعالارىنىڭ 2012 جىلعى قىزىن زورلاپ كەلگەن, دەپ جازادى qandastar.kz Smartnews.kz باسىلىمىنا سىلتەپ.

جامبىل وبلىسىنىڭ مويىنقۇم اۋدانىنا قاراستى اۋىلداردىڭ بىرىندە 12 جاستاعى قىزدى تۋعان اكەسىنىڭ ەكى ءىنىسى التى جىل بويى زورلاپ كەلگەن. اقىر اياعى قىز بالا جۇكتى بوپ قالعان. قازىر ول جۇكتىلىكتىڭ جەتىنشى ايىندا.

اياعى اۋىر قىز بالا وسى ۋاقىت ارالىعىندا ساباقتارىنان قالماعان, ال مەكتەپتەگىلەر قىزدىڭ ەكىقابات ەكەنىن ءتىپتى بايقاماعان بوپ شىقتى.

Orda.kz باسىلىمى قىزدىڭ تۋىستارىمەن تىلدەسكەن. بەلگىلى بولعانداي, بالاعا قۇمارتقان قاسكوي اعايىندىلاردىڭ ءبىرى 37, ال ەكىنشىسى 35 جاستا كورىنەدى.

ودان بولەك كۇدىكتىلەردىڭ ءبىرى ءالى دە بوستاندىقتا قاشىپ جۇرگەن كورىنەدى. سول ءۇشىن دە قىزدىڭ ناعاشىلارى جيەنىنىڭ ءومىرى ءۇشىن قاتتى الاڭداۋلى. ولار «زورلىقشى قۇدالارىنىڭ» قىزعا قىسىم كورسەتۋىن, ونى ودان ءارى قورقىتۋىن جالعاستىرا ما دەپ قورقادى. پوليتسيا قر قىلمىستىق كودەكسىنىڭ 120-بابىنىڭ 4-بولىگى بويىنشا قىلمىستىق ءىس قوزعالعانى تۋرالى حابارلاعان ەدى. اتالعان باپقا ءمان بەرسەك, ەگەر كۇدىكتىلەردىڭ قىلمىستارى دالەلدەنسە, كىنالىلەر كامەلەتكە تولماعان بالانى بىرىگىپ زورلاپ كەلگەنى ءۇشىن ەلىمىزدەگى ەڭ اۋىر جازاعا تارتىلادى. ياعني ولار — ءومىر بويىنا باس بوستاندىعىنان ايىرىلادى.

«قىلمىس جاسادى دەگەن ەكى كۇدىكتى انىقتالدى. جەدەل-ىزدەستىرۋ ءىس-شارالارىن جۇرگىزۋ ناتيجەسىندە پوليتسيا قىزمەتكەرلەرى ءبىر كۇدىكتىنى ۇستاپ, ونى تۇتقىندادى. ال ەكىنشى كۇدىكتى ىزدەستىرىلىپ جاتىر. ونى ۇستاۋ ءۇشىن بارلىق قاجەتتى شارالاردى قولدانىپ جاتىرمىز. سونداي-اق مەكتەپ قىزمەتكەرلەرىنە قاتىستى وقۋشىنىڭ ءومىرى مەن دەنساۋلىعىنىڭ قاۋىپسىزدىگىن قامتاماسىز ەتۋ جونىندەگى مىندەتتەردى تيىسىنشە ورىنداماعانى ءۇشىن قر قك 141-بابىنىڭ 1-بولىگى بويىنشا قىلمىستىق ءىس قوزعالدى», — دەپ ءتۇسىندىردى پوليتسيا.

قازىرگى ۋاقىتتا جەدەل-تەرگەۋ توبى جۇمىس ىستەپ جاتىر. قىلمىستىق ءىس پوليتسيا دەپارتامەنتى باسشىلىعىنىڭ باقىلاۋىنا الىنعان.