12 جاسىندا انا اتانعان وقۋشىعا جاڭا باسپانا بەرىلدى

فوتو: Instagram/rupr.pvlshakenova

بۇل تۋرالى پاۆلودار وبلىسىنىڭ بالا قۇقىقتارى جونىندەگى وڭىرلىك ۋاكىلى ساۋلە شاكەنوۆا مالىمدەدى.

12 جاسىندا بوسانعان پاۆلودار وبلىسىنىڭ تۇرعىنى ءالى دە پەريناتالدىق ورتالىقتا. دارىگەرلەر ونىڭ جاعدايى مەن نارەستەنىڭ ءحالى دە قاناعاتتانارلىق دەپ باعالايدى.

بۇل تۋرالى پاۆلودار وبلىسىنىڭ بالا قۇقىقتارى جونىندەگى وڭىرلىك ۋاكىلى ساۋلە شاكەنوۆا مالىمدەدى.

«بوسانعان قىزلدىڭ لاكتاتسياسى باسىلدى, بالاعا قوسپا ءسۇت بەرىلۋدە. جاس انا 1 قىركۇيەكتەن باستاپ مەكتەپتەگى وقۋىن جالعاستىرادى. ونىڭ پسيحوەموتسيونالدى جاعدايى مامانداردىڭ ۇنەمى باقىلاۋىندا بولادى. ءسۇت قوسپالارىمەن قامتاماسىز ەتۋ زاڭنامادا كوزدەلگەن نورمالارعا سايكەس جۇرگىزىلەدى», — دەدى ساۋلە شاكەنوۆا.

سونداي-اق, قىزدىڭ وتباسى جاڭا ۇيگە كوشىرىلگەنى اتاپ ءوتىلدى. ال, تۇرعىن ءۇيدى كەرەك-جاراقپەن قامتاماسىز ەتۋگە موڭعوليادان كەلگەن كاسىپكەر-مەتسەناتتار كومەكتەسكەن.

«ولار بۇل وتباسىن كەم دەگەندە قر ازاماتتىعىن رەسىمدەگەنگە دەيىن «سۇيەمەلدەۋگە» نيەت ءبىلدىردى. قولدانىستاعى نورماتيۆتىك-قۇقىقتىق اكتىلەر انانىڭ ومىرلىك جاعدايى قيىن بولعان جاعدايدا, اتا-انا قۇقىقتارىن شەكتەمەي, جاڭا تۋعان نارەستەنى 12 ايعا دەيىنگى مەرزىمگە انالار ۇيىنە ورنالاستىرۋدى كوزدەيدى. دەگەنمەن, اتا-اناسى باس تارتىپ, بالانى وزدەرى باعا الاتىندىعىن ايتقان. سوندا دا, وتباسى جەرگىلىكتى اتقارۋشى ورگاندار تاراپىنان قاتاڭ باقىلاۋدا بولادى ونىڭ ىشىندە مەنىڭ تاراپىمنان دا», — دەپ تۇيىندەدى شاكەنەۆا.

ايتا كەتەيىك, جاس انانىڭ وتباسىنا كومەك قولىن سوزعان مەتسەناتتار قاتارىندا كوپ بالالى اكە, كاسىپكەر جانە وبلىستىق ءماسليحات دەپۋتاتى اسىلبەك تۋعانباي بار. 25 جىل بۇرىن ول وتباسىمەن بىرگە موڭعوليادان ءوزىنىڭ تاريحي وتانى – قازاقستانعا كوشىپ كەلگەن. بۇل وقيعا تۋرالى بىلگەننەن كەيىن ول بىردەن قانداستاردىڭ, دوستارىنىڭ, كاسىپكەرلەردىڭ اتىنان كومەك ۇسىندى. بولاشاقتا دا ول وتباسىعا كومەكتەسۋگە نيەتتى.

اسىلبەك تۋعانبايعا جاڭا تۋعان قىزعا ەسىم بەرۋ قۇرمەتتى قۇقىعى بەرىلدى. ول نارەستەنىڭ ەسىمىن توميريس دەپ قويدى.