12 جىلعا باس بوستاندىعىنان ايىرىلعان گۇلميرا ساتىبالدىعا قاتىستى ۇكىم وزگەرىسسىز قالدى

فوتو: stan.kz

5 قاڭتاردا گۇلميرا ساتىبالدى ءىسى بويىنشا اپەللياتسيا سوتى ونلاين رەجيمدە وتكىزىلدى. اپەللياتسيالىق سوت ءبىرىنشى ساتىنىڭ شەشىمىن وزگەرىسسىز قالدىردى. بۇل تۋرالى qandastar.kz اقپارات اگەنتتىگى حابارلايدى.

مالىمەتتەرگە سەنسەك, قايرات ساتىبالدىنىڭ بۇرىنعى جۇبايى ءۇش باپ بويىنشا ايىپتالعان:

• «زاڭسىز باس بوستاندىعىنان ايىرۋ»
• «قورقىتىپ الۋ».
• «وزىمباستىلىق».

Stan.kz جازعانداي, سوت ايىپتالۋشىعا 12 جىلعا باس بوستاندىعىنان ايىرۋ جازاسىن تاعايىندادى.

ەسكە سالايىق, گۇلميرا ساتىبالدىنىڭ بۇرىنعى كۇيەۋ بالاسى اباي ءجۇنىسوۆ ونىڭ نۇسقاۋىمەن 2019 جىلدىڭ 13 اقپانىنان شىلدەسىنە دەيىن التى اي بويى ءوز ەركىنەن تىس ۇيقاماقتا ۇستالعانىن ايتىپ, سوتقا جۇگىنگەن. سونىمەن قاتار ول قايرات ساتىبالدىنىڭ بۇرىنعى ايەلىن ولاردىڭ ورتاق بيزنەسى – Baur Kazakhstan اق اكتيۆتەرىن تارتىپ الدى دەپ ايىپتاپ وتىر. سوت پروتسەسى 3 ماۋسىمدا باستالعان.

1. گۇلميرا ساتىبالدىعا قىلمىستىق كودەكستىڭ 126-بابى 3-بولىگىنىڭ 3-تارماعى (زاڭسىز باس بوستاندىعىنان ايىرۋ, اۋىر زارداپتارعا اكەپ سوقتىرعان الدىن الا ءسوز بايلاسۋ), 194-باپتىڭ 4-بولىگىنىڭ 2-تارماعى (زورلىق-زومبىلىق قولدانۋ قاۋپىمەن اسا ءىرى مولشەردە بوپسالاۋ) بويىنشا ايىپ تاعىلىپ وتىر.
2. ونىمەن بىرگە ونىڭ قول استىندا جۇمىس ىستەگەن ءمادي باتىرشاەۆ قىلمىستىق كودەكستىڭ 126-بابى 3-بولىگىنىڭ 3-تارماعى (زاڭسىز باس بوستاندىعىنان ايىرۋ, اۋىر زارداپتارعا اكەپ سوقتىرعان الدىن الا ءسوز بايلاسۋ) ايىپتالىپ وتىر.

بۇعان دەيىن گۇلميرا ساتىبالدى سوت وتىرىسىندا دەنساۋلىعىنىڭ ناشارلاۋىنا بايلانىستى سوڭعى ءسوزىن ايتۋدان باس تارتتى.

وتكەن جولعى سوت وتىرىسىندا پروكۋرور ايىپتالۋشىنى 13 جىل باس بوستاندىعىنان ايىرۋدى سۇرادى. سونىمەن قاتار جابىرلەنۋشىلەر گۇلميرا ساتىبالدى مەن ءمادي باتىرشاەۆتان 11 ميلليارد تەڭگەدەن استام سومانى ءوندىرۋدى تالاپ ەتتى.