120 teńge: Almaty máslıhaty qoǵamdyq kólikte jol júrýdiń jańa tarıfin maquldady

Foto: inbusiness.kz

Almatyda qalalyq Máslıhattyń kezekten tys XXI sessııasy kezinde qoǵamdyq kóliktiń qunyn 120 teńgege kóterý týraly sheshim qabyldady, dep habarlady Qandastar.kz.

Almaty qalasy Máslıhatynyń depýtaty, Qurylys, sáýlet, ýrbanıstıka jáne jer qatynastary jónindegi turaqty komıssııasynyń tóraǵasy Nursultan Shoqanov bul ózgeristiń sebebin túsindirdi.

– Bizde sýbsıdııa rekordtyq kórsetkishke jetip otyr. Bıyl tasymaldaýshy kompanııalarǵa bólinip otyrǵan 97 mlrd teńge Qyzylorda, Taldyqorǵan syndy oblystyq mańyzy bar qalalardyń bıýjetimen birdeı. Tarıf pen sýbsıdııa mundaı baǵytta júre beretin bolsa, basqarýǵa kelmeıtin proessterge alyp kelýi múmkin. Sondyqtan biz tarıf baǵasyn birtindep kóterip otyrýdan eshqaıda kete almaımyz. Birinshiden, jergilikti bıýdjetke túsetin júktemeni azaıtýymyz kerek. Biraq bul shaǵyn ósim halyqtyń áleýmettik osal toptaryna áser etpeıdi. Búgingi deıin kim tegin júrse, olar ári qaraı da tegin júre beredi, kimniń 50% jeńildigi bolsa, bul jeńildik olarda qalady. Jolaqynyń quny qalanyń barlyq bóliginde, barlyq marshrýttarǵa birdeı. Adam 70 shaqyrym júrip ótse de, osy 120 teńgeni tóleıtin bolady. Aılyq jol júrý aqysy 7200 teńgeden 9900 teńgege kóterildi, – dedi ol.

Máslıhat depýtaty qolma-qol tólem jasaý múmkindiginiń nelikten alynyp tastalǵanyn da túsindirdi. Tólemniń qolma-qol jasalýy – júrgizýshilerdiń jumysyn jeńildetedi, olardy alańdaý sebepterin azaıtatynyn aıtty.

Sondaı-aq Nursultan Shoqanov tarıfterdiń kóterilýin qoldaıtynyn aıtty.

Máslıhat depýtattarynyń aldynda sóz sóılegen qalalyq mobıldilik basqarmasynyń basshysy Saǵyndyq Telibaev byltyr tamyzda jol júrý tarıfi 11 jylda alǵash ret 100 teńgege deıin kóterilgenine qaramastan, jol aqysyn tóleýden túsetin kúndelikti túsimder avtobýstardy jóndeý, qosalqy bólshekter men shyǵyn materıaldaryn satyp alý sııaqty tasymaldaýshylardyń barlyq shyǵyndaryn ótemeıtinin atap ótti.

«Jyl saıyn avtobýstarǵa, qosalqy bólshekterge jáne ózge de shuǵyl shyǵystarǵa baǵanyń ósýi tirkelýde. Qosalqy bólshekterdi ýaqtyly satyp alý múmkin emes, al bul jolaýshylar tasymalynyń sapasyna teris áser etýde. Sonyń saldarynan qala turǵyndary ádil shaǵymdar jasaıdy. Ákimdik pen jeke tasymaldaýshylar jyljymaly quramdy únemi jańartyp otyrý jáne jumys istep turǵan avtoparkti sapaly kútip ustaý úshin orasan zor qarajat bólýge májbúr», – dedi Saǵyndyq Telibaev.