جاڭالىقتار
«13 جاستاعى قىز كولىك قاعىپ كوز جۇمدى»: ساتباەۆ قالاسى اكىمىنىڭ ورىنباسارى جازاعا تارتىلدى
ۇلىتاۋ وبلىسىنىڭ پوليتسيا دەپارتامەنتى ساتباەۆ قالاسى اكىمىنىڭ ورىنباسارى جولداعى جۇمىس تالاپتارىن ورىنداماعانى ءۇشىن جاۋاپكەرشىلىككە تارتىلعانىن حابارلادى, دەپ جازادى qandastar.kz
ولىمگە اكەلىپ سوققان جول-كولىك وقيعاسى 16 ماۋسىم كۇنى بولدى. جەڭىل كولىك جۇرگىزۋشىسى جاياۋ جۇرگىنشىلەر وتكەلىندە بالانى قاعىپ كەتكەن. قىز بالا العان جاراقاتتارىنان كوز جۇمدى.
پوليتسيا سوتقا دەيىنگى تەرگەۋ جۇرگىزىپ جاتىر. جۇرگىزۋشى ۋاقىتشا ۇستاۋ يزولياتورىنا قامالدى. سونىمەن قاتار, قالا اكىمىنىڭ ورىنباسارى دا جاۋاپكەرشىلىككە تارتىلدى.
«جولدا جۇمىس جۇرگىزۋ تالاپتارىن ورىنداماعانى, ناقتى ايتقاندا جاياۋ جۇرگىنشى وتكەلىنىڭ سايكەس جول بەلگىلەرىنىڭ بولماۋى سەبەپتى ساتباەۆ قالاسى اكىمىنىڭ ورىنباسارى جاۋاپكەرشىلىككە تارتىلدى. بۇعان دەيىن قالا اكىمدىگىنە جاياۋ جۇرگىنشى وتكەلىنە جول بەلگىسىن سالۋ جونىندە نۇسقاما بەرىلگەن بولاتىن», – دەلىنگەن حابارلامادا.
Tyrkistan.kz جازعانداي, ءىس بويىنشا تەرگەۋ بارىسى دەپارتامەنت باسشىلىعىنىڭ باقىلاۋىندا.
