144 mlrd jymqyrǵan Ertaev bostandyqta: Sot raqymshylyq sebebin túsindirdi

Foto: Andreı Lýpın

Buǵan deıin habarlaǵynymyzdaı, 144 mlrd teńge jymqyrdy degen kúdikpen 11 jylǵa sottalǵan eks-bankır Jomart Ertaev raqymshylyqqa ilingen edi. Almaty oblysynyń soty Ertaev qalaı raqymshylyqqa ilingenin túsindirgen, dep jazady qandastar.kz

Azattyq Rýhy málimetinshe, Almaty oblysy Alataý qalalyq sotynyń baspasóz qyzmeti habarlaǵandaı, Ertaevtyń raqymshylyq týraly ótinishi 2 qyrkúıek kúni qaralǵan eken.

«J.Ertaev 2020 jylǵy 16 qarashada Almaty qalasy Almaly aýdandyq sotynyń úkimimen QR QK-niń 189-baby 4-bóliginiń 2-tarmaǵy, 28-baby 3-bóligi, 228-baby boıynsha aýyr qylmys jasaǵany úshin sottalǵan. 2025 jylǵy 2 qyrkúıektegi jaǵdaı boıynsha J.Ertaev 8 jyl 3 aı 14 kún bas bostandyǵynan aıyrý jazasyn ótedi (15.11.2018 jyldan bastap qamaýda bolǵan, qamaýdaǵy ýaqyty bir kúni bir jarym kúnimen eseptelgen), ótelmegen merzimi 11 aı 16 kún», — dep habarlaıdy sot.

Skifnews.kz habarlaǵandaı, Ertaev otyrǵan qamaý orny onyń minez-qulqyna oń bańa bergen eken. Al, «Raqymshylyq týraly» Zańǵa saı, eger sottalǵan adamnyń qalǵan merzimi bir jyldan az bolsa jáne teris minez-qulyq dárejesi bolmasa, aýyr jáne asa aýyr qylmystar úshin sottalǵandardyń ótelmegen bóligi keshiriledi.

«Sot J.Ertaevtyń ótinishi qanaǵattandyrdy. Sottalǵan J.Ertaevtyń negizgi jazasynyń ótelmegen 11 aı 16 kúni bosatyldy», — dep habarlaıdy sot.