«15 jasta tuńǵyshyma aıaǵym aýyr edi»: Qazaqstandyq qyz 18 jasynda úsh balanyń anasy atanǵan

Foto: Otbasylyq muraǵattan

Shymkenttik 19 jastaǵy Zarına Myrzabek – úsh balanyń anasy. Zarına Stan.kz tilshisine bergen suhbatynda 15 jasynda turmysqa shyǵyp, kelindik qyzmetke erte aralasqanyn aıtty.

Zarına kúıeýin 15 jasynda kolledjde oqyp júryp kezdestirgen.

“9-synyptan keıin kolledjge oqýǵa tústim. Al kúıeýim kolledjge 11-synyptan keıin tústi. О́zi 2003 jylǵy. Ekeýimiz bir grýppada oqydyq. Keıin ekeýmiz jerles ekenimizdi bilgen soń jaqyn aralasa bastadyq. Ekeýimiz jarty jyldaı qyz ben jigit bolyp kezdesip júrdik. Keıin aıaǵym aýyr ekenin bildim. Ol kezde 15 jasta edim. Sol jyly 6 maýsym kúni 16-ǵa toldym. Ol kezde ishtegi bala 7 aılyq edi. Men 16 jasqa tolǵan soń eki jaqtyń kelisimimen nekemizdi qıdyq”, – deıdi keıipker.

Alaıda jastardyń bul sheshimine Zarınanyń ata-anasy qarsylyq bildirgen.

“Árıne, tym erte degen oı boldy, biraq balalaryma qarap shúkir etemin. Kúıeýimniń ata-anasy qarsy bolǵan joq. Biraq meniń ata-anam shamaly qarsylyq bildirdi. Degenmen kóndirdim. Tuńǵyshymdy 16 jasymda 2021 jyly 22 tamyzda bosandym. Ekinshi balamdy 2023 jyly 6 sáýirde dúnıege ákeldim. Úshinshi balam bıyl qańtardyń 19-y kúni ómirge keldi. Qazir shúkir, eki ul, bir qyzym bar”, – deıdi Zarına.

Keıipkerimiz qazir joǵarǵy oqý ornynda ınterer dızaıneri mamandyǵynda oqyp jatyr. Bala kútimine baılanysty bir jylǵa akademııalyq demalys alǵan.

“Qazir ata-enemmen birge turamyn. Kelindik ómirge úırený qatty qıyn boldy dep aıtpaımyn. Kóp dúnıeden baıhabar boldym. Biraq kelin bolyp túskeli bárin úırenip jatyrmyn. Ata-enem men kúıeýimniń týystary meni jaqsy qabyldady. Qazir ata-enem bala qarap kómektesedi. Alǵash kelin bolyp túskende jańa otbasyma tez sińisip kettim. Árıne, ara-tura túsinispeýshilikter bolyp turady. Men úshin tamaq jasap úırený, qamyr jaıý ońaı bolmady”, – deıdi keıipkerimiz.

Sondaı-aq kelin bolyp túsken otbasynyń tártibi Zarına úshin tańsyq bolǵan.

“Men óz úıimde ata-anamnan suranbaıtynmyn. Basqa áýletke kelin bolyp túskennen keıin baratyn jerge suranyp, aıtyp otyrý kerek boldy. Ata-enem “kelin” dep emes, “qyzym” dep qabyldaǵan soń, aıtarlyqtaı qıyndyqtar bolmady”, – deıdi kelinshek.

Foto: Otbasylyq muraǵattan

Jastaı ana baqytyn sezingen Zarına tuńǵyshyn dúnıege ákelgende-aq moınyna qandaı jaýapkershilik alǵanyn túsingen.

“Alǵash ret ana atanǵanda balamnyń ómiri men qaýipsizdigine jaýapty ekenimdi, ony qatarynan qaldyrmaı baǵyp-qaǵý meniń moınymda ekenin túsindim. Tún uıqyny tórt emes qyryq tórt ret bóldim. Árıne, ońaı boldy deýge kelmes. Qazir sol ulym 4 jasqa keledi. Bala kútimine qatysty qıyndyqtar boldy dep aıta almaımyn. Úıde ata-enem qarasqan soń bolar, ýaqyt jetkize almaı, úlgermeı júrgen kezim bolmapty. Ata-enem qandaı jaǵdaı bolmasyn aqylyn aıtyp, keńesin berip otyrady. Biraq bala tárbıesi eshqashan ońaı bolǵan emes. Ornymen erkeletip, aqylmen jónge salý da danalyq. Basynan sıpasań tym erkelep ketedi, uryssam ózimniń júregim aýyrady”, – dedi Zarına aǵynan jarylyp.