جاڭالىقتار
«15 جاستاعى قىزعا ۇيلەنىپ, جۇكتى قىلعان»: قىزىلوردادا 21 جاستاعى جىگىت سوتتالىپ كەتتى
فوتو: ۆيدەو سكرين
قىزىلوردا وبلىسىندا 21 جاستاعى جىگىت 15 جاسار ءجاسوسپىرىمدى جۇكتى قىلعانى ءۇشىن 12 جىلعا سوتتالدى. ول كامەلەتكە تولماعان ءجاسوسپىرىمدى جىنىستىق قاتىناسقا يتەرمەلەگەنى ءۇشىن كىنالى دەپ تانىلدى. الايدا اتا-انالارى سوت ۇكىمىنە شاعىمدانىپ, ەكى جاستىڭ قوسىلۋىنا قارسى ەمەس ەكەنىن ايتادى, دەپ حابارلايدى qandastar.kz ينفورمبيۋرو-عا سىلتەمە جاساپ.
قىزىلوردا وبلىسىندا اتا-انالارىنىڭ رۇقساتىمەن 21 جاستاعى جىگىت پەن 15 جاستاعى قىز مولداعا نەكەسىن قيدىرعان. اتا-انالارى نۇرتىلەۋ مەن ايالانىڭ ۇيلەنۋ تويىن دا وتكىزىپتى. كەيىن 15 جاستاعى ايالا جۇكتى بولىپ, دارىگەرگە كورىنگەن. ەمحاناداعىلار بۇل اقپاراتتى پوليتسەيلەرگە جەتكىزدى.
“بالا ءتۇسىپ قالاتىن قاۋپى بار دەگەن سوڭ ۋزي-گە تۇسىردىك. ءبىر اپتادان كەيىن پوليتسياعا شاقىردى. سودان تەرگەۋ باستالدى. ءۇش اي بالامدى تەرگەدى. مىناۋ انشىلەردىڭ قىزى كەتىپ جاتىر عوي. ولارعا زاڭ جوق تا, بىزگە كەلگەندە زاڭ بار ما? بالامدى پەدوفيل قىلىپ كورسەتىپ, 12 جىلعا سوتتاپ جىبەردى”, – دەدى سوتتالۋشىنىڭ اناسى گۇلبانۋ اشىرباەۆا.
سوتقا 15 جاستاعى ايالا جابىرلەنۋشى رەتىندە قاتىسقان. بىراق ايالا ءجۇرسىن ءالى كۇنگە دەيىن كۇيەۋىنىڭ ۇيىندە تۇرىپ, كەلىندىك مىندەتىن اتقارىپ ءجۇر. ول سوتتا ءوز ەركىمەن تۇرمىسقا شىققانىن ايتىپتى. سوندا دا سۋديا مەن قۇزىرلى ورگان وكىلدەرى جىگىتتى كىنالى دەپ تانىدى.
“مەن بۇل ۇكىمگە كەلىسپەيمىن, كۇيەۋىمدى بوساتىپ بەرىڭىزدەر دەدىم. 15 جاستان ۇيلەنىپ جاتقاندار كوپ قوي. سولار باقىتتى بولۋعا لايىق تا, بىز نەگە باقىتتى بولۋعا لايىق ەمەسپىز دەگەن سۇراق بار. نە ءۇشىن مەنىڭ كۇيەۋىم جازىقسىزدان جازىقسىز تۇرمەدە وتىر”, – دەدى 15 جاستاعى ايالا ءجۇرسىن.
ۇكىم بىلتىر قاراشادا شىققان. بۇل ءىس جابىق تۇردە قارالعان ەكەن.
“نۇرتىلەۋ يبراگيموۆ قىلمىستىق كودەكسىنىڭ 122-بابى 3-بولىگىنىڭ 1-تارماعى “ون التى جاسقا تولماعان اداممەن جىنىستىق قاتىناس نەمەسە سەكسۋالدىق سيپاتتاعى وزگە دە ارەكەتتەردى جاساۋ” بويىنشا كىنالى دەپ تانىلسىن. وعان پەدوگوگيكالىق لاۋازىمداردى جانە كامەلەتكە تولماعاندارمەن جۇمىس ىستەۋگە ءومىر بويى ايىرا وتىرىپ, 12 جىلعا باس بوستاندىعىنان ايىرۋ جازاسى تاعايىندالسىن”, – دەپ مالىمدەدى قىزىلوردا وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى.
اپپەلياتسيالىق سوتتا دا 21 جاستاعى جىگىتتىڭ جاقىندارىنىڭ شاعىمى قاناعاتتاندىرۋسىز قالعان. اتا-انالار ەندى جوعارى سوتقا جۇگىنبەك.
