“15 جىل بويى 30-عا جۋىق ءمايىتتى جاسىرىن ساقتاعان” — سۇمدىق جاعدايدىڭ قۇپياسى اشىلدى

اقش-تىڭ كولورادو شتاتىنداعى پۋەبلو قالاسىندا قوعامدى ءدۇر سىلكىندىرگەن وقيعا ورىن الدى. قۇزىرلى ورگاندار Davis Mortuary جەرلەۋ بيۋروسىنان ۇزاق جىلدار بويى ساقتالىپ كەلگەن 30-عا جۋىق ءمايىتتى انىقتادى, دەپ جازادى qandastar.kz

بۇل مەكەمە اۋداندىق كورونەر برايان كوتتەردىڭ مەنشىگى ەكەنى بەلگىلى بولدى. تەكسەرۋ بارىسىندا مايىتتەردىڭ جاسىرىن بولمەدە, كارتوننان جاسالعان سورەگە ۇقساس ەسىكتىڭ ار جاعىندا ساقتالعانى بەلگىلى بولدى. كەيبىر دەنەلەر كرەماتسيانى 15 جىلعا دەيىن كۇتكەن. ال مارقۇمداردىڭ جاقىندارىنا بيۋرو يەسى قولدان جاسالعان, جالعان كۇل سالىنعان ۋرنالاردى تاپسىرعان.

Alash.kz جازعانداي,  وقيعادان كەيىن جەرلەۋ ءۇيىنىڭ ليتسەنزياسىنىڭ كۇشى جويىلدى. جەرگىلىكتى بيلىك بۇل جاعدايدى “زاڭنىڭ ورەسكەل بۇزىلۋى” ءارى “وتباسىلار سەنىمىن اياق استى ەتۋ” دەپ باعالادى. دەگەنمەن برايان كوتتەر ءالى قاماۋعا الىنعان جوق, تەرگەۋ جالعاسۋدا.

Davis Mortuary رەسمي سايتىندا مەكەمەنىڭ 1989 جىلدان بەرى جۇمىس ىستەيتىنى, ال ونىڭ باسشىلارى ءوزىن “جەرلەۋ ىسىندەگى ءداستۇرلى مەكتەپ وكىلدەرى” رەتىندە تانىستىرعانى جازىلعان.

Associated Press مالىمەتىنشە, جاقىن ۋاقىتقا دەيىن كولورادو شتاتىندا جەرلەۋ سالاسى ەڭ از قاداعالاناتىن سالالاردىڭ ءبىرى بولىپ كەلگەن. تەكسەرۋلەر شاعىم تۇسكەن جاعدايدا عانا جۇرگىزىلىپ, قىزمەتكەرلەردىڭ ارنايى ءبىلىمى مەن ليتسەنزياسى تالاپ ەتىلمەگەن.

تەك 2023 جىلى وزگە ءبىر جەرلەۋ بيۋروسىنان 200-گە جۋىق ءمايىت تابىلعاننان كەيىن زاڭ قاتايتىلدى. سول مەكەمە يەسى ءمايىت بولىكتەرىن ساتقانى جانە قولدان جاسالعان ۋرنالاردى تاپسىرعانى ءۇشىن سوتتالعان. قازىر جاڭا تالاپتارعا سايكەس, جەرلەۋ ۇيلەرىنىڭ ديرەكتورلارى مەن قىزمەتكەرلەرى ارنايى وقۋ باعدارلاماسىنان ءوتىپ, ليتسەنزيا الىپ, جەكە دەرەكتەرى بويىنشا تەكسەرۋدەن وتۋگە مىندەتتى.