16 ميلليون قازاقستاندىقتىڭ جەكە دەرەگى تاراپ كەتتى

تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى بارلىق دەرلىك قازاقستاندىقتىڭ جەكە دەرەكتەرىنىڭ تاراپ كەتكەنى تۋرالى اقپاراتقا قاتىستى مالىمدەمە جاسادى, دەپ حابارلايدى Qandastar.kz اقپارات پورتالى Skifnews.kz سايتىنا سىلتەمە جاساپ. 

16 ماۋسىمدا قازاقستان تۇرعىندارىنىڭ جەكە دەرەكتەرى بار 16,3 ميلليون جازبا الەۋمەتتىك جەلىگە تاراپ كەتكەنى تۋرالى اقپارات پايدا بولدى. بۇل اقپاراتتى كيبەرشابۋىلداردى تالداۋ جانە تەرگەۋ ورتالىعىنىڭ پرەزيدەنتى ولجاس ساتيەۆ راستادى.

16 ميلليوننان استام جازبا تاراعان. وندا تەگى, اتى, اكەسىنىڭ اتى, جىنىسى, تۋعان كۇنى, جسن, مەكەنجايى, تۇرعىلىقتى جەرى, تەلەفوندارى (ۇيالى تەلەفون, ءۇي, جۇمىس), ازاماتتىعى, ۇلتى جانە ت.ب. قولجەتىمدى بولدى.

تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى ەندى ءتيىستى جۇمىستار جۇرگىزىپ جاتىر.

“اقپاراتتىق قاۋىپسىزدىك كوميتەتى قۇقىق قورعاۋ جانە ارنايى ورگاندارمەن بىرلەسىپ, ۇسىنىلعان مالىمەتتەردىڭ شىنايىلىعى مەن وزەكتىلىگىن انىقتاۋ ماقساتىندا كەشەندى تەكسەرۋ جۇرگىزىپ جاتىر. العاشقى تالداۋ بۇل دەرەكتەردىڭ مەملەكەتتىك ەمەس, ياعني جەكەمەنشىك اقپاراتتىق جۇيەلەردەن الىنۋى مۇمكىن ەكەنىن كورسەتىپ وتىر. مەملەكەتتىك اقپاراتتىق جۇيەلەردەن دەربەس دەرەكتەردىڭ تارالۋى نەمەسە حاكەرلىك شابۋىلدار تىركەلگەن جوق. تەكسەرۋ تولىق اياقتالعانعا دەيىن قانداي دا ءبىر قورىتىندى جاساۋ ەرتە”, – دەلىنگەن حابارلامادا.

ەگەر ازاماتتىڭ دەربەس دەرەكتەرى تاراعان مالىمەتتەر اراسىندا بولسا, ول تۋرالى ەلەكتروندى ۇكىمەت پورتالى (eGov) ارقىلى جەكە كابينەتىنە حابارلاما جولدانادى ەكەن.

مينيسترلىك قوسىمشا اقپارات تەكسەرۋ ناتيجەلەرى بويىنشا جاريالاناتىنىن ءتۇسىندىردى.