16 ملن قازاقستاندىقتىڭ جەكە دەرەگى تاراعان: مينيستر وتستاۆكاعا كەتە مە

تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ 16 ميلليون قازاقستاندىقتىڭ جەكە دەرەكتەرىنىڭ تاراپ كەتۋىنە قاتىستى پىكىر ءبىلدىردى, دەپ حابارلايدى qandastar.kz Ulysmedia.kz-كە سىلتەمە جاساپ.

مينيستر نە دەيدى

ماديەۆ تاراپ كەتكەن جاڭا دەرەكتەر ەمەس ەكەنىن ايتادى. ونىڭ سوزىنشە, قازىر تالداۋ جۇرگىزىلىپ جاتىر. ساراپشىلار جۇمىس ىستەپ جاتىر.

— مەملەكەتتىك دەرەكتەر بازاسى بۇزىلعان جوق. بۇل – بۇرىن تاراپ كەتكەن تاريحي دەرەكتەر بولۋى مۇمكىن. قازىر ولار داركنەتتە قولجەتىمدى. كەيبىر Telegram-ارنالاردا جاريالانعان ساتتە ءبىز ولاردى بۇعاتتاپ وتىرامىز. بۇل دەرەكتەردە ازداعان جاڭارتۋلار بولعان. اتالعان مالىمەتتەر 2024 جىلدىڭ 1 مامىرىنا دەيىنگى كەزەڭگە جاتادى. جاڭا اۋقىمدى دەرەكتەر تاراعان جوق. اراسىندا اتى-ءجونى, جسن, تەلەفون ءنومىرى سياقتى دەرەكتەر جاريا بولىپ كەتەتىن جاعدايلار كەزدەسىپ تۇرادى. مۇنداي دەرەكتەر اشىق قولجەتىمدى بولعان كەزدە ءبىز دەرەۋ شارا قولدانامىز, دەيدى مينيستر.

ۇلىسمەديا ءتىلشىسىنىڭ “دەرەكتەر ءسىزدىڭ كەزىڭىزدە تاراپ كەتپەدى مە?” دەگەن ناقتىلاۋ سۇراعىنا مينيستر “جوق” دەپ جاۋاپ بەردى.

مينيستر بۇل جايتتان كەيىن وتستاۆكاعا كەتۋى مۇمكىن بە

سونىمەن قاتار, ۇلىسمەديا ءتىلشىسى مينيستردەن “بۇل جاعداي وتستاۆكاعا كەتۋىنە سەبەپ بولماي ما?” دەپ سۇرادى.

— بۇل – دەرەك جاي عانا تارالعان جاعداي, دەرەكتەردى بۇزىپ الۋ دا, حاكەرلىك شابۋىل دا ەمەس. بۇل — ءبىر كەزدەرى تاراپ كەتكەن دەرەكتەر بازاسى. كەيىن بەلگىلى ءبىر تۇلعالار سول مالىمەتتەردى جيناقتاپ وتىرعان, دەيدى ماديەۆ.

كونتەكست

16 ماۋسىمدا Telegram-ارنا SexuriXy.kz قازاقستاندىقتاردىڭ جەكە دەرەكتەرى تاعى دا جاپپاي تاراعانى تۋرالى حابارلادى. ارحيۆتىك فايلدا ازاماتتاردىڭ اتى-ءجونى, جىنىسى, تۋعان كۇنى, جسن, بايلانىس نومىرلەرى (ۇيالى, جۇمىس, ءۇي), ازاماتتىعى, ۇلتى جانە مەكەنجايى قامتىلعان.