16 جاستاعى قىز جاتاقحانادا كوز جۇمدى: اتا-اناسى سەبەبىن انىقتاۋدى سۇرايدى

فوتو: ۆيدەودان سكرين

جەتىسۋ وبلىسىندا بەلگىسىز جاعدايدا كوز جۇمعان 16 جاستاعى قىزدىڭ تۋىستارى تەرگەۋدىڭ سوزىلىپ كەتكەنىنە نارازى. ولار زارينا بەرىكوۆانىڭ ۋلانىپ كوز جۇمعانىنا سەنبەيدى. سوندىقتان قايتادان ساراپتاما تاعايىنداپ, كۋاگەرلەردەن سۇراق-جاۋاپ الىنۋىن تالاپ ەتەدى. بۇل تۋرالى Stan.kz اقپارات اگەنتتىگى 31-ارنانىڭ ينفورمبيۋرو جاڭالىقتار باعدارلاماسىنا سىلتەمە جاساپ حابارلايدى.

جازيرا توعاسباەۆا 7 اي بۇرىن جالعىز قىزىنان ايىرىلدى. زارينا 9-سىنىپتى ءبىتىرىپ, تالدىقورعانداعى يننوۆاتسيالىق كوللەدجدىڭ فيلولوگيا فاكۋلتەتىنە وقۋعا ءتۇسىپ, جاتاقحاناعا ورنالاسادى. الايدا 6 ايدان سوڭ ستۋدەنت قىز مەرت بولدى.

“7 اي بولدى, ءالى نەدەن كوز جۇمعانى بەلگىسىز. ءبىر اقيقاتىوسى ۋاقىتقا دەيىن شىعۋ كەرەك ەدى. ءىس تەرگەلىپ جاتىر دەيدى. نەشە ايدىڭ ءجۇزى بولدى ەسىكتەرىن قاعىپ بارامىز, ەشقانداي ءالى اقيقات جوق”, – دەدى مارقۇمنىڭ اناسى جازيرا توعاسباەۆا.

قايعىلى وقيعا كۇنى جازيرا قىزىن ساباقتان سۇراپ الىپ, تۇسكە دەيىن بىرگە ۋاقىت وتكىزىپتى. ايتۋىنشا, كوڭىل-كۇيى جاقسى بولعان, دەمالىستا اۋىلعا بارامىن دەپ ايتقان. كەشكە قاراي اناسىنا ء«بارى جاقسى» دەپ تاعى دا حابارلاسىپتى. سودان جارتى ساعات وتپەي وقۋ ورنىنداعى مۇعالىمدەر جەدەل جاردەم شاقىرعاندارىن ايتقان.

“بەينەباقىلاۋ كامەراسىنىڭ جازباسىن اشىپ كورگەنبىز. ياعني كامەرادان بايقادىق. قىزىمىز زارينا ويناپ-ك ۇلىپ ءجۇر. 20:03-تە فويەگە كومناتاسىنان شىعادى, سول جەردە 2 سەكۋند قانا كومەندانتتىڭ ەسىك جاعىنا توقتايدى, ودان ءارى قاراي ءوتىپ, 20:04-تە كومەندانت كومناتاسىنا قايتىپ كىرەدى. سول جەردەن قىزىمىزدىڭ دەنەسىن الدىق”, – دەدى مارقۇمنىڭ تۋىسى ايىم جيىنبەك.

مارقۇمنىڭ تۋىستارىنىڭ ايتۋىنشا, بۇل بەينەجازبا ىستە تىركەلىپ, كەيىن جوق بولىپ كەتكەن. ولار وسىمەن ءتورتىنشى تەرگەۋشىنىڭ قولىنا وتكەن ءىستىڭ كۇماندى تۇستارى كوپ دەيدى. پوليتسەيلەر بويجەتكەننىڭ تەلەفونىنىڭ قۇپيا ءسوزىن اشا المادىق دەگەنمەن, جۋىردا قىزدىڭ جاقىندارىنا جازعان حاتتارى ءوشىرىلىپتى.

“وتباسىلىق چات بار. سودان 29 ماۋسىمدا شامامەن تۇسكى ۋاقىتتا زارينا توپتان شىقتى دەپ بىزگە سمس كەلەدى. تەلەفون 28 اقپاننان بەرى ۋۆد -دا جاتقاننان كەيىن ونى كىم قولدانۋى مۇمكىن?قالاي ول شىعىپ كەتەدى?! بۇل جەرگە 25 رەت كەلسەك تە, ەشقانداي وزگەرىس جوق. ءىس قالاي اشىلدى, سول قالپىندا ءالى تۇرمىز. ەشقانداي ءىس ءجۇرىپ جاتقان جوق”, – دەدى ايىم جيىنبەك.

مەديتسينالىق ساراپتاما قورىتىندىسى بويىنشا قىز ۋلانعان. الايدا قانداي ءدارىنىڭ قانشالىقتى مولشەردە اسەر ەتكەنى بەلگىسىز. مارقۇمنىڭ جاقىندارى بۇل قورىتىندىمەن كەلىسپەيدى. ولار ءمايىتتى جۋىندىرعاندا, وڭ كوزىنىڭ ماڭىنان سوققى ءىزى مەن استىڭعى ەرنىنىڭ ىشىنەن جىرىلىپ كەتكەنىن بايقاعان.

زارينادان ايىرىلىپ قالعان اۋلەت تەرگەۋدىڭ ءادىل ءوتۋىن تالاپ ەتەدى.