«16 جاستاعى قىزدى 1000 ەركەك زورلادى»: نالىباەۆ قىزىلوردادا تازالاۋ جۇمىستارىن باستادى

فوتو: قىزىلوردا وبلىسى اكىمدىگى

بۇگىن, 16 تامىزدا قىزىلوردا وبلىسىنىڭ اكىمى نۇرلىبەك نالىباەۆ جينالىس وتكىزىپ, كامەلەتكە تولماعان قىزدى جەزوكشەلىكپەن اينالىسۋعا ماجبۇرلەۋ فاكتىسىنە ۋاقىتىندا كەدەرگى كەلتىرمەگەن ۋاكىلەتتى تۇلعالارعا قاتاڭ شارالار قابىلداۋدى قاراماعىنداعىلاردان تالاپ ەتتى, دەپ حابارلايدى Qandastar.kz

وبلىس اكىمى اتاپ وتكەندەي, بىرنەشە كۇننەن بەرى الەۋمەتتىك جەلىلەر مەن بۇقارالىق اقپارات قۇرالدارىندا كامەلەتكە تولماعان قىزدى جەزوكشەلىكپەن اينالىسۋعا ماجبۇرلەگەن قىزىلورداداعى مەكتەپ تۇلەكتەرىنىڭ ارەكەتى تالقىلانۋدا.

ايماق باسشىسى بۇل اتىشۋلى قىلمىستان جارتى جىلعا جۋىق ۋاقىتتان بەرى پوليتسيا دەپارتامەنتىنىڭ ۇيىمداسقان قىلمىسپەن كۇرەس باسقارماسى مەن قىزعا ساباق بەرەتىن مۇعالىمدەر بەيحابار بولعانىن قاتاڭ سىنعا الدى.

– الەۋمەتتىك جەلىلەردە ۋچاسكەلىك پوليتسيا ينسپەكتورى مەن مەكتەپتىڭ يۋۆەنالدى پوليتسيا قىزمەتكەرى ماسەلەدەن حاباردار بولعاندىعى جونىندە اقپارات تارادى. نەگىزگى سالعىرتتىق وسى قىزمەتكەرلەردەن باستالعان. وزدەرىنە بەكىتىلگەن اۋماقتاعى احۋالدى الدىن- الا زەردەلەپ, ءار تۇرعىندى باقىلاۋى ءتيىس ەدى. بىراق, ونداي جۇمىس مۇلدە جۇرگىزىلمەگەن. ءبىلىم سالاسىنىڭ ماماندارى دا قىزمەتتەرىنە نەمقۇرايلى قاراعان. مەكتەپ باسشىلىعى, پەداگوگتەر, مەكتەپ ينسپەكتورى, ءوز مىندەتتەرىڭىزدى ورىنداماعانسىزدار! مەكتەپ پسيحولوگى, سىنىپ جەتەكشىلەرى, الەۋمەتتىك پەداگوگ, مەكتەپ ديرەكتورىنىڭ تاربيە ءىسى جونىندەگى ورىنباسارى جانە ديرەكتور زاڭ اياسىندا قانداي دا ءبىر ناقتى قادامعا بارماعان, – دەدى ن.نالىباەۆ.

وبلىس اكىمى وقۋشىنىڭ ساباقتان ءجيى قالاتىنىنا ءتيىستى مامانداردىڭ نازار اۋدارماعانىن, اتا-اناسىمەن ءتيىستى دەڭگەيدە پروفيلاكتيكالىق جۇمىس جۇرگىزبەگەنىن, تەك ماسەلەنى جاسىرىپ-جابۋعا تىرىسقاندارىن ايتتى.

– بۇگىننەن باستاپ №7 مەكتەپ – ليتسەي ديرەكتورى, تاربيە ءىسى جونىندەگى ورىنباسارى, پسيحولوگى, الەۋمەتتىك پەداگوگى, سىنىپ جەتەكشىلەرى جۇمىستان بوساتىلسىن. قىزىلوردا قالاسى اكىمىنىڭ وسى سالاعا جاۋاپتى ورىنباسارىنا, قالالىق ءبىلىم ءبولىمىنىڭ باسشىسىنا قاتاڭ سوگىس, ءبولىمنىڭ تاربيە جونىندەگى جاۋاپتى مامانىنا جۇمىستان بوساتۋ شاراسى قولدانىلسىن. ءبىلىم باسقارماسىنىڭ باسشىسىنا ءوز مىندەتتەرىن ءتيىستى دەڭگەيدە ورىنداماعانى ءۇشىن قىزمەتىنە تولىق سايكەس ەمەستىگى تۋرالى ەسكەرتۋ بەرەمىن. وزىنە جۇكتەلگەن مىندەتتى ءتيىستى دەڭگەيدە ورىنداماعان مەكتەپ ينسپەكتورى مەن ۋچاسكەلىك پوليتسيا ينسپەكتورى, ونى باقىلاماعان كامەلەتكە تولماعاندار ءىسى جونىندەگى يۋۆەنالدى پوليتسيا بولىمشەسى, قالالىق پوليتسيا باسقارماسى مەن وبلىستىق جەرگىلىكتى پوليتسيا قىزمەتى ۇيىمداسقان قىلمىسقا قارسى كۇرەس باسقارماسى تىكەلەي كىنالى. وسى ورايدا, جاۋاپتى مامانداردىڭ جاۋاپكەرشىلىگىن قاراپ, قىزمەتىنەن بوساتۋعا دەيىنگى كادرلىق شەشىمدەر قابىلدانسىن. قابىلدانعان شەشىمدەر تۋرالى جۇمىس اياعىنا دەيىن بايانداڭىز, – دەدى ن.نالىباەۆ.

بالا قۇقىقتارىن قورعاۋ جونىندەگى وبلىستىق ۋاكىل جاقسىگۇل توعانوۆاعا وبلىستىڭ ءبىلىم بەرۋ ۇيىمدارىنداعى جۇمىستارعا تالداۋ جۇرگىزىپ, دەرەۋ جۇمىس توبىن قۇرۋ تاپسىرىلدى. بۇل رەتتە الدىن الۋ شارالارىن قولدانىپ, قولايسىز وتباسىلاردى جانە تاۋلىككە جالعا بەرىلەتىن پاتەرلەردى ارالاۋ قاجەت ەكەنى ايتىلدى.

ايماق باسشىسى وقيعادان زارداپ شەككەن وتباسىنا جان-جاقتى كومەك كورسەتۋدى, تەرگەۋدىڭ بارىنشا وبەكتيۆتى جۇرگىزىلۋىن تالاپ ەتتى.

– قوزعالعان قىلمىستىق ءىس بويىنشا تەرگەپ-تەكسەرۋ امالدارىنىڭ وبەكتيۆتى جۇرگىزىلۋى مىندەتتەلەدى. قىلمىسقا قاتىسى بار ادامنىڭ بارلىعى زاڭ اياسىندا ءتيىستى جاۋاپكەرشىلىككە تارتىلاتىن بولسىن! بۇل ماسەلەنى تىكەلەي باقىلاۋىمدا ۇستايمىن, – دەپ تۇيىندەدى نۇرلىبەك نالىباەۆ.