جاڭالىقتار
18 ملن پارا: جەر رەسۋرستارىن باسقارۋ دەپارتامەنتى باسشىسى جانە ونىڭ سىبايلاسى سوتتالدى
فوتو: نۇربولات نۇرجاۋباي
جەر رەسۋرستارىن باسقارۋ دەپارتامەنتى باسشىسى مەن ونىڭ سىبايلاسى سوتتالدى, دەپ حابارلادى Qandastar.kz.
تۇركىستان قالالىق سوتى جەر رەسۋرستارىن باسقارۋ دەپارتامەنتىنىڭ باسشىسى ا.مىرزاەۆقا, ونىڭ سىبايلاسى ا.بالتاباەۆقا جانە وسى دەپارتامەنتتىڭ ءبولىم باسشىسى ب.جەتپىسوۆكە قاتىستى ۇكىم جاريالادى. بۇل تۋرالى انتيكوردىڭ ءباسپاسوز قىزمەتى ءمالىم ەتتى.
رەسمي مالىمەت بويىنشا مىرزاەۆ پەن بالتاباەۆ الاياقتىق پەن پارا بەرۋگە يتەرمەلەۋ, ال جەتپىسوۆ – پارا بەرۋگە وقتالۋ بويىنشا كىنالى دەپ تانىلدى.
– مىرزاەۆ پەن ونىڭ سىبايلاسى بالتاباەۆ جەر ۋچاسكەسىن رەسىمدەۋ ءۇشىن كاسىپكەردىڭ 18 ملن تەڭگە كولەمىندەگى اقشالاي قاراجاتىن يەمدەنگەنى انىقتالدى. سونىمەن قاتار مىرزاەۆ لاۋازىمدى تۇلعالارعا جالپى قامقورلىعى ءۇشىن پارا بەرۋ سىلتاۋىمەن بۇرىن كەلىسىلگەن جەتپىسوۆتىڭ 5 ملن تەڭگەسىنىڭ 70 مىڭ تەڭگە سوماسىنداعى اقشالاي قاراجاتىن الاياقتىق جولىمەن يەمدەندى, – دەلىنگەن حابارلامادا.
سوت ۇكىمىمەن مىرزاەۆقا 8 جىل, بالتاباەۆقا – 7 جىل جانە جەتپىسوۆكە – 3 جىل مەرزىمگە باس بوستاندىعىنان ايىرۋ جانە مەملەكەتتىك قىزمەتتە قىزمەت ەتۋ قۇقىعىنان ءومىر بويىنا ايىرۋ جازاسى تاعايىندالدى.
ۇكىمدى جاريا ەتۋ تۇركىستان قالاسىنىڭ جەر رەسۋرستارىن باسقارۋ جونىندەگى وبلىستىق دەپارتامەنتى مەن جەر قاتىناستارى ءبولىمى ۇجىمىنىڭ قاتىسۋىمەن ءوتتى. ۇكىم زاڭدى كۇشىنە ەنگەن جوق.
