18 ناۋرىز — «ۇلتتىق كيىم» كۇنى

ءار ۇلتتى ەرەكشەلەندىرەتىن – ءداستۇرلى قۇندىلىقتارى. ادامنىڭ جەكە قولتاڭباسى بولاتىنى سەكىلدى, ءار ۇلتتىڭ قولتاڭباسى ىسپەتتى دارا ادەت-عۇرپى, سالت-ساناسى بار.

ۇلتتىق كيىم – كەز كەلگەن حالىق مادەنيەتىنىڭ اجىراماس بولشەگى. ول جاي عانا كيىم ەمەس, ءبۇتىن ۇلتتىڭ بەت-بەدەرىن ايقىندار ۇلان-عايىر تاريح.

وسىعان وراي رەسپۋبليكالىق ناۋرىز مەركەسىنە ارنالعان ونكۇندىك شەڭبەرىندە شىمكەنتتە 18 ناۋرىز – «ۇلتتىق كيىم» كۇنى وتەدى. بۇل كۇنى ۇلتتىق كيىم ديزاينەرلەرىنىڭ بايقاۋى ۇيىمداستىرىلادى.

ءىس-شارانىڭ ماقساتى — قازاقتىڭ ۇلتتىق كيىم ۇلگىلەرىن كوپشىلىككە ناسيحاتتاۋ ارقىلى قازاقتىڭ كيىم كيۋ ۇلگىسىن زاماناۋي جاڭعىرتۋ. وسى باعىتتا جۇمىس اتقارىپ جاتقان ۇلتتىق كيىم ديزاينەرلەرىنىڭ تۋىندىلارىن حالىققا كەڭىنەن ناسيحاتتاۋ, سونداي-اق ءسان الەمىنە ينتەگراتسيالاۋعا ىقپال ەتۋ.

جالپى, قازاقتىڭ ۇلتتىق كيىمدەرى وزگە حالىقتارعا ۇكسامايتىن وزىندىك ەرەكشەلىكتەرىمەن كوشپەلى تىرشىلىككە سايكەس قالىپتاسقان. قازاقى كيىمنىڭ بارشا ساندىلىگى ونىڭ ويۋ-ورنەگىندە, ءاربىر اشەكەيىندە حالقىمىزدىڭ تاريحىنىڭ, وي-دۇنيەسىنىڭ قايتالانباس كورىنىسى جاتىر. ەرتە زامانداردان بۇگىنگە دەيىن ءوزىنىڭ قادىر-قاسيەتىن جويماي, قازاق قولونەرىنىڭ وزىق ۇلگىسى رەتىندە عانا ەمەس, ءارى اسەم, ءارى ىڭعايلىلىعىمەن دە پايدالانۋدان قالماي كەلە جاتقان ۇلتتىق كيىمدەرىمىز جەتەرلىك. سونداي-اق, قازاق كيىمدەرى ەتەك-جەڭى مول, قاراپايىم, جۇمىسقا جانە ءجۇرىپ — تۇرۋعا ۇيلەسىمدى, دەنە سىمباتىن اشاتىن ءساندى بولىپ كەلگەن.