«ءۇش سارباز جابىلىپ سوققىعا جىقتى دەيدى»: جاركەنتتە اسكەري بولىمشە كاپيتانىنىڭ ءمايىتى تابىلدى

14 قاراشا ساعات 01:00 شاماسىندا 74261 اسكەري ءبولىمىن باقىلاۋ توبىنىڭ قۇرامىندا جەتەكشىلىك ەتەتىن 26 جاستاعى دارحان داۋلەتتىڭ ءمايىتى تابىلدى. جەلىدە تاراعان اقپارات بويىنشا جىگىتتى 3 سارباز جابىلىپ سوققىعا جىققان.

اپكەسى جىگىتتىڭ جاركەنتتەگى اسكەري بولىمدە قىزمەت ەتكەنىنە نەبارى 3 اي بولعانىن ايتادى. بۇعان دەيىن وتاردا, الماتىعا قىزمەت ەتىپتى. ءوزى جاركەنتتىك بولعاندىقتان, وسى جەرگە اۋىسقىسى كەلگەن.

“داۋلەت – ءۇيىنىڭ تۇڭعىشى. سول ءۇشىن اتا-اناسىنىڭ جانىندا ولارعا قولعابىس ەتكىسى كەلىپ ءجۇردى. ءساتى ءتۇسىپ, قىركۇيەكتە اۋىستى. “ەندى جۇمىسىڭ قالاي, ۇناپ جاتىر ما?” دەپ سۇراعانىمدا, “بولادى, اقىرىنداپ” دەپ قىسقا قايىراتىن. ءتىپتى ۇيلەنىپ, وتباسىلى بولىپ تا ۇلگەرمەدى”, – دەدى اپكەسى.

داۋلەت دارحاننىڭ جاقىندارى ءىستىڭ قاي باپپەن قوزعالعانى, تەرگەۋ بويىنشا ءىستىڭ ءمان-جايىنان حابارسىز. قورعانىس مينيسترلىگى ءبارىن جاسىرىن ۇستاپ وتىر دەيدى. ولار تەك سوت-مەديتسينالىق ساراپتاما قورىتىندىسىن كۇتىپ وتىر. الايدا ولارعا جەتكەن جانە جەلىدە تاراعان اقپارات بويىنشا ءۇش سارباز داۋلەتكە ءتيىسىپ, ارالارىندا جانجال شىققان. ال تاعى ءبىر نۇسقا بويىنشا وبەكتىلەردىڭ ديۆەرسياعا قارسى جوسپاردان تىس وقۋ-جاتتىعۋلاردى وتكىزۋ كەزىندە قاۋىپسىزدىك ەرەجەلەرى بۇزىلىپ, وقىس وقيعا بولدى.

“قاتارداعى جاۋىنگەرلەر نۇرمان ابسادىق, باقبەرگەن رۋستام ۇلى, ايات شاكىر كاپيتانعا جابىلعان دەيدى. سودان سوڭ اياق-قولىن بايلاپ, 74261 اسكەري ءبولىمىنىڭ سپورت قالاشىعىنا قاراي اپارىپ, ونى سول جەردە قالدىرىپ كەتكەن. داۋلەتتىڭ ەس-ءتۇسسىز جاتقانىن سپورت قالاشىعىنىڭ جانىنان ءوتىپ بارا جاتقان اعا لەيتەنانت سۇيىندىك بايقاعان. ول نارياد پەن كەزەكشى دارىگەردى شاقىرتتى. جەدەل جاردەم كەلگەنشە ول مەرت بولىپ كەتتى. ساربازدارعا داۋلەتتى ۇرسىن دەپ اسكەري ءبولىمنىڭ كومانديرى مايور قازتاي تاپسىرما بەرگەن دەيدى”, – دەدى گۇلميرا ماۋلەتقىزى.

ماۋلەتقىزى اتالمىش اقپارات سونداعى اسكەريلەر اراسىندا تاراپ جاتقانىن ايتادى.

ء“ولىمنىڭ الدىن الا سەبەبى – قىلقىندىرۋ دەيدى. وفيتسەرلەر چاتىندا قاۋىپسىزدىك ەرەجەسى بۇزىلعان دەپ جازىلدى. سول كەزدە داۋلەتتىڭ اياق-قولىن بايلاپ, سىرتقا شىعارىپ تاستاعان دەپ ايتادى. شىندىق اشىلماي قالادى دەپ قورقامىز. “ابايسىزدا كىسى ءولىمى” نەمەسە “قاۋىپسىزدىك شارالارىن بۇزۋ” دەپ جالتارىپ كەتەتىن سياقتى, بىراق ول قيسىنعا سىيمايدى”, – دەدى مارقۇمنىڭ جاقىنى.

Stan.kz ءتىلشىسى قورعانىس مينيسترلىگىنەن جاعداي بويىنشا پىكىر سۇرادى.

“14 قاراشادا ديۆەرسياعا قارسى قاۋىپسىزدىك بويىنشا جوسپاردان تىس ساباقتار وتكىزۋ بارىسىندا قاۋىپسىزدىك شارالارىن بۇزۋ سالدارىنان جاركەنت گارنيزونى اسكەري بولىمدەرىنىڭ ءبىرىنىڭ وفيتسەرى العان جاراقاتىنان مەرت بولدى. اتالعان فاكتى بويىنشا قىلمىستىق ءىس قوزعالدى, تەرگەۋ مۇددەسى ءۇشىن وزگە دە اقپارات جاريا ەتىلمەيدى.

قۇرلىق اسكەرلەرىنىڭ قولباسشىلىعى مارقۇمنىڭ تۋىستارى مەن جاقىندارىنا كوڭىل ايتادى, ولارعا بارلىق قاجەتتى كومەك كورسەتىلەدى”, – دەپ مالىمدەدى قۇرلىق اسكەرلەرىنىڭ ءباسپاسوز قىزمەتى مەرۋەرت ماقاشەۆا.