19 balany oqytqan. Qarasaı aýdanynda zańsyz medrese anyqtaldy

Foto: ashyq derekkóz

Almaty oblysy Qarasaı aýdanynda 19 balany zańsyz oqytqan jasyryn medrese jumys istep turǵanyn anyqtady, dep habarlaıdy Ulysmedia.kz.

Oblystyq prokýratýranyń málimetine qaraǵanda, Tájikstan eliniń týmasy jeke úıdiń aýmaǵynda arab jazýlary bar dinı ádebıetterdi qoldanyp, balalarǵa sabaq bergen.

Tekserý kezinde 179 dana dinı ádebıet, sonymen qatar uıaly telefon men noýtbýk tárkilenip, tıisti saraptamalar belgilendi. Kináli adamdy zańmen belgilengen jaýapkershilikke tartý máselesi qarastyrylyp jatyr. Qazir balalar ata-analaryna qaıtaryldy, – delingen habarlamada.

Esterińizge sala keteıik, dál osyǵan uqsas jaǵdaı Shymkent qalasynda da tirkeldi. Onda elimizde shekteý qoıylǵan dinı aǵym óz jumysyn jasap kelgen.