شەرزات بولاتتىڭ اكەسىنىڭ ۇستىنەن قىلمىستىق ءىس قوزعالدى

فوتو: Qaz365.kz

بيىل قازاننىڭ باسىندا تالعارداعى جانجال كەزىندە قازا تاپقان شەرزات بولاتتىڭ اكەسى قارجاۋباي نۇرىموۆتىڭ ۇستىنەن قىلمىستىق ءىس قوزعالدى. بۇل تۋرالى نۇرىموۆتىڭ ادۆوكاتى اسقار قايماقوۆ الەۋمەتتىك جەلىدەگى پاراقشاسىندا حابارلادى, دەپ جازدى qandastar.kz

ادۆوكات مالىمەتىنشە, پوليتسيا بۇگىن قارجاۋباي نۇرىموۆتىڭ ۇستىنەن قىلمىستىق ءىس قوزعاعان. «بۇگىن پوليتسيا قارجاۋباي نۇرىموۆقا قاتىستى قر قك 202-بابى نەگىزىندە (بوتەن ادامنىڭ مۇلكىن قاساقانا جويۋ نەمەسە ءبۇلدىرۋ) سوتقا دەيىنگى تەرگەۋ جۇمىستارىن باستادى», — دەپ جازدى ادۆوكات Facebook الەۋمەتتىك جەلىسىندەگى پاراقشاسىندا.

بۇعان قاتىستى الماتى وبلىسىنىڭ پوليتسيا دەپارتامەنتى Telegram-داعى ارناسىندا اقپارات تاراتىپ, قىلمىستىق ءىس قوزعالعانىن راستادى.

«پوليتسيا بوتەننىڭ مۇلكىن قاساقانا ءبۇلدىرۋ فاكتىسى بويىنشا قىلمىستىق ءىس تىركەدى. 10 جەلتوقساندا ەڭبەكشىقازاق اۋدانىنىڭ ازات اۋىلىندا ورىن العان قۇقىققا قارسى ءىس-قيمىل ناتيجەسىندە اۆتوكولىك يەسىنە ماتەريالدىق زالال كەلتىرىلگەنى انىقتالدى, بۇل اكىمشىلىك جاۋاپكەرشىلىك شەگىنەن ەداۋىر اسىپ, ءىس-ارەكەتتىڭ قىلمىستىق سارالانۋىنا اكەپ سوعادى», — دەپ حابارلادى الماتى وبلىسى پوليتسياسى. وبلىستىق پوليتسيا مالىمەتىنشە, نۇرىموۆ «قوعامدىق ورىندا جانە پوليتسيا قىزمەتكەرلەرىنە قارسى دورەكى ءسوز سويلەدى, ولاردى پىشاقپەن قورقىتتى, سونىمەن قاتار باسقا بىرەۋدىڭ مۇلكىنە قاساقانا زاقىم كەلتىردى, اتاپ ايتقاندا, كولىكتى پىشاقپەن سىرىپ, دوڭگەلەكتى تەسىپ تاستادى».

قىلمىستىق كودەكستىڭ 202-بابى ەكى جىلعا دەيىن باس بوستاندىعىنان ايىرۋ جازاسىن قاراستىرادى.