1991 جىلدان بەرى ەلگە قانشا ەتنيكالىق قازاق ورالدى?

فوتو ©️ Tengrinews.kz / تۇرار قازانعاپوۆ

جىل باسىنان بەرى 8,7 مىڭنان استام ەتنيكالىق قازاق قانداس مارتەبەسىن الدى, دەپ حابارلايدى Tengrinews.kz ءتىلشىسى ەڭبەك جانە حالىقتى الەۋمەتتىك قورعاۋ مينيسترلىگى مالىمەتىنە سىلتەمە جاساپ.

ۆەدومستۆو مالىمەتىنشە, 2024 جىلدىڭ 1 شىلدەدەگى جاعداي بويىنشا 8 758 ەتنيكالىق قازاق تاريحي وتانىمەن تابىسىپ, قانداس مارتەبەسىن الدى. جالپى 1991 جىلدان بەرى رەسپۋبليكاعا 1 ميلليون 137,1 مىڭ ەتنيكالىق قازاق ورالعان.

«جىل باسىنان قازاقستانعا كەلگەن قانداستاردىڭ جارتىسى (49,5 پايىز) قىتايدان, 34,7 پايىز – وزبەكستاننان, 5,9 پايىز – تۇرىكمەنستاننان, 5,3 پايىز – موڭعوليادان, 3,3 پايىز – رەسەيدەن جانە 1,3 پايىز باسقا ەلدەردەن.

بيىلعى 1 شىلدەدەگى جاعداي بويىنشا, ەڭبەككە قابىلەتتى جاستاعى ەتنيكالىق قونىس اۋدارۋشىلار 59 پايىز, ەڭبەككە قابىلەتتى جاستان كىشى 31,1 پايىز جانە زەينەتكەرلەر 9,9 پايىز بولدى», – دەلىنگەن حابارلامادا.

ەڭبەككە قابىلەتتى جاستاعى قانداستاردىڭ ىشىنەن ءبىلىم دەڭگەيى بويىنشا, 17 پايىزى جوعارى ءبىلىمدى, 23,2 پايىزى ورتا كاسىبي ءبىلىمدى, 55,2 پايىزى جالپى ورتا ءبىلىمدى, جانە 4,6 پايىزىنىڭ ءبىلىمى جوق.

قونىس اۋدارعان ەتنيكالىق قازاقتار رەسپۋبليكانىڭ ءتۇرلى وڭىرلەرىنە قونىستانعان.

«سونىمەن قاتار, قانداستاردى قونىستاندىرۋ ءۇشىن كەلەسىدەي ەڭبەك كۇشى تاپشى وڭىرلەر انىقتالدى: اقمولا, اباي, قوستاناي, پاۆلودار, شىعىس جانە سولتۇستىك قازاقستان وبلىستارى.  قونىستاندىرۋ وڭىرلەرىندە 2024 جىلعا ارنالعان قانداستاردى قابىلداۋ كۆوتاسى 2 433 ادام بولادى. 2024 جىلعى 1 شىلدەگە جاعداي بويىنشا قونىستاندىرۋ وڭىرلەرىنە 1891 قانداس قونىس اۋداردى. جوعارىدا اتالعان وڭىرلەردە قونىستانعان قانداستارعا كوشۋگە سۋبسيديا تۇرىندە مەملەكەتتىك قولداۋ شارالارى ۇسىنىلادى – ءبىر مەزگىلدە وتاعاسىنا جانە وتباسىنىڭ ءاربىر مۇشەسىنە 70 اەك (258,4 مىڭ تەڭگە) مولشەرىندە; تۇرعىن ءۇي جالداۋعا جانە كوممۋنالدىق قىزمەتتەرگە اقى تولەۋگە – ءبىر جىل ىشىندە 15-تەن 30 اەك (55,3-دەن 110,7 مىڭ تەڭگەگە دەيىن) مولشەرىندە».

جىل باسىنان بەرى 1579 قانداسقا ءتۇرلى قولداۋ شارالارى كورسەتىلدى. اتاپ ايتقاندا, 456 ادام تۇراقتى جۇمىسقا ورنالاستىرىلدى.