«2,2 ملرد تەڭگەنىڭ بۇزۋشىلىقتارى»: مەماۋديت ەسىرتكى بيزنەسىمەن كۇرەستەگى ماسەلەلەردىڭ باسىن اشتى

اۋديتورلىق ءىس-شارالار ىشكى ىستەر, دەنساۋلىق ساقتاۋ جانە ادىلەت مينيسترلىكتەرىن, سونداي-اق ۇقك شەكارا قىزمەتىنىڭ ۆەدومستۆولىق باعىنىستى ۇيىمدارىن قامتىدى. اۋديت 2019 جىلعى قاڭتاردان باستاپ 2024 جىلعى ماۋسىمعا دەيىنگى كەزەڭ ارالىعىنا جۇرگىزىلدى.

«جوعارى اۋديتورلىق پالاتانىڭ قورىتىندىسىندا كورسەتىلگەندەي, قاراجاتتى ۇتىمسىز پايدالانۋ فاكتىلەرى انىقتالدى. ماسەلەن, 2023-2024 جىلدارى بيۋدجەتتىك باعدارلامالاردىڭ اكىمشىلەرى 2 ملرد تەڭگە يگەرىلمەگەن قاراجاتتى بيۋدجەتكە قايتارعان», دەلىنگەنۆەدومستۆونىڭ 2024 جىلعى 6 قاراشاداعى حابارلاماسىندا.

جەكەلەگەن ۇيىمداردا ارنايى تەحنيكالىق قۇرالدار مەن تەكسەرۋ جابدىقتارىن ساتىپ الۋ شىعىندارىن جوسپارلاۋدا كەمشىلىكتەر بار: جوسپارلانعان قاراجات كەي جاعدايلاردا ىلەسپە قۇجاتتار نەمەسە كوممەرتسيالىق ۇسىنىس بويىنشا ناقتى قۇنىنان 4-5 ەسە اسىپ تۇسەدى.

«بۇل 133 ملن تەڭگەگە جۋىق قاراجاتتى ءتيىمسىز جوسپارلاۋعا سەبەپ بولىپ وتىر. ناشاقورلىقتىڭ الدىن الۋدىڭ بىرىڭعاي مودەلىن ازىرلەۋ بويىنشا باستاما ءالى ىسكە اسىرىلعان جوق. سونىمەن قاتار ەسىرتكىگە تاۋەلدى ادامداردى الەۋمەتتىك وڭالتۋ مەديتسينالىق قىزمەت بولىپ سانالمايدى جانە دەنساۋلىق ساقتاۋ مينيسترلىگى تاراپىنان رەتتەۋگە جاتپايدى. ناتيجەسىندە بۇل باعىتتا ستاندارتتار مەن بەكىتىلگەن ادىستەمەلەر جوق».جوعارى اۋديتورلىق پالاتانىڭ ءباسپاسوز قىزمەتى

جىل باسىندا قر ىشكى ىستەر مينيسترلىگىنىڭ كەڭەيتىلگەن القا وتىرىسىندا مەملەكەت باسشىسى قاسىم-جومارت توقاەۆ مەملەكەتتىك ورگاندارعا ەسىرتكىنىڭ تارالۋىنا قارسى كۇرەستى كۇشەيتۋ قاجەتتىگىن اتاپ ءوتتى.

«سينتەتيكالىق ەسىرتكىنىڭ قولجەتىمدىلىگى جانە ونىڭ بارىنشا تەز تارالۋى جاستار اراسىندا ناشاقورلىقتىڭ بەلەڭ الۋىنا اكەپ سوقتىرادى. ولارعا ناشاقورلىقتىڭ قانشالىقتى قاتەرلى ەكەنىن ۇنەمى ءتۇسىندىرىپ وتىرۋ قاجەت. پوليتسيا ەسىرتكى ءوندىرۋ, ونى ساتۋ جانە تاراتۋعا قارسى بەلسەندى كۇرەس جۇرگىزۋى كەرەك», — دەدى پرەزيدەنت.

قر ءىىم ەسىرتكى قىلمىسىنا قارسى ءىس-قيمىل كوميتەتىنىڭ اقپاراتى بويىنشا بۇگىنگى تاڭدا Tik-Tok, Telegram, OLX, VK جانە باسقا دا تانىمال پلاتفورمالارمەن ىنتىماقتاستىق بويىنشا شارالار قابىلدانۋدا.

«بۇل زاڭسىز كونتەنتتى جەدەل جويىپ وتىرۋعا مۇمكىندىك بەرەدى. مىسالى, OLX پلاتفورماسىنان كۋرەر كەيپىندەگى ەسىرتكىنى جاسىرۋشىلاردى جالداۋ جونىندەگى 4,3 مىڭنان استام حابارلاما جويىلدى. قازىر مۇنداي حابارلامالار 5 مينۋت ىشىندە جويىلادى. قر ءىىم مالىمەتى بويىنشا ناتيجەسىندە وسى سايت ارقىلى ەسىرتكى كۋرەرلەرىن ارباۋ مۇمكىن ەمەس», دەلىنگەن حابارلامادا.

سونىمەن قاتار ەسىرتكى قىلمىسىنا قارسى كۇرەس ءۇشىن قاجەتتى تەحنيكا مەن جابدىقتاردى ساتىپ الۋ, سونداي-اق قىزمەتتىك-ىزدەستىرۋ يتتەرىن دايارلاۋ جۇمىستارى باياۋ جۇرۋدە.

مەملەكەتتىك اۋديت قورىتىندىسى بويىنشا بارلىعى 2,2 ملرد تەڭگەگە بۇزۋشىلىقتار انىقتالدى. ونىڭ ىشىندە:

• قارجىلىق بۇزۋشىلىقتار – 14,7 ملن تەڭگە;
• قاراجاتتى ءتيىمسىز جوسپارلاۋ – 2 ملرد تەڭگەدەن استام;
• قاراجاتتى ءتيىمسىز پايدالانۋ – 251,6 ملن تەڭگە. 9 جۇيەلىك كەمشىلىك انىقتالدى.