«2,5 مىڭ تەڭگە تۇراتىن تاريف قازىر 6,5 مىڭ تۇرادى»: ۇيالى بايلانىس وپەراتورلارىنا ايىپپۇل سالىندى

فوتو: vlast.kz

شىمكەنتتە 147 جەردە ۇيالى بايلانىستىڭ ناشارلاۋى تىركەلدى. سول سەبەپتى بايلانىس وپەراتورلارىنا ايىپپۇل سالىندى. قازىر قاراجاتتى وتەۋ جۇمىستارى جۇرگىزىلۋدە, دەپ حابارلايدى qandastar.kz Otyrar.kz-كە سىلتەمە جاساپ. 

سوڭعى 7 ايدا بايلانىس وپەراتورلارىنا 44 ملن تەڭگە ايىپپۇل سالىندى. قازىر قاراجاتتى ءوندىرىپ الۋ جۇمىستارى جۇرگىزىلىپ جاتىر. ايتا كەتەيىك, شىمكەنتتە ورناتىلعان 1600 بازالىق ستانتسيانىڭ 147-سىندە بايلانىس ساپاسىنا قاتىستى پروبلەمالار انىقتالعان. بۇل تۋرالى تسيفرلاندىرۋ باسقارماسىندا ايتىلدى.

«ەڭ كوپ ايىپپۇل 22 ملن تەڭگە Kcell-گە سالىندى, ال Beeline جانە Tele2 ارقايسىسىنا 11 ميلليون تەڭگەدەن ايىپپۇل سالىندى», – دەدى تسيفرلاندىرۋ ءبولىمىنىڭ باسشىسى مۇحيت كەمەلوۆ. دەگەنمەن قالا تۇرعىندارى ينتەرنەتتىڭ ءالى دە دۇرىس ىستەمەيتىنىن ايتادى. بۇعان قوسا سوڭعى ءبىر جىلدا تاريفتەردىڭ قۇنى بىرنەشە ەسەگە وسكەن.

«2,5 مىڭ تەڭگە تۇراتىن تاريف قازىر 6,5 مىڭ تۇرادى. ولار ءبىزدىڭ كەلىسىمىمىزسىز قوسادى», «ماعان ۇنايدى, جاقسى ۇستايدى», «دۇرىس جۇمىس ىستەمەيدى. ينتەرنەتكە كىرۋ قيىن», «بايلانىس ناشار. بۇرىن 2900 تەڭگە تولەيتىنبىز, قازىر 5900 تەڭگە تولەپ جاتىرمىز», – دەيدى شىمكەنتتىكتەر. وتكەن جىلى الدىن الا ەسكەرتۋسىز بايلانىس قۇنىنىڭ كوتەرىلۋ فاكتىسى ورىن العان. ماماندار ازاماتتاردىڭ ارىز-شاعىمى نەگىزىندە وپەراتورلارعا ەسكەرتۋلەر بەرىلگەنىن ايتادى. «وپەراتورلار قۇنى وسكەنگە دەيىن ءبىر اي بۇرىن ەسكەرتۋى كەرەك. تەك سودان كەيىن عانا باعاسىن كوتەرە الادى. قۇزىرلى ءبولىم بىلتىرعى ءىس بويىنشا جۇمىس ىستەپ جاتىر. تاريف قۇنى شارت تالاپتارىنا ساي بولۋى كەرەك», – دەپ ءتۇسىندىردى مۇحيت كەمەلوۆ.

ايتا كەتۋ كەرەك, بيىل شىمكەنتتە 20 ەلدى مەكەنگە تالشىقتى-وپتيكالىق جەلىنى تارتۋ جوسپارلانۋدا. ناتيجەسىندە 210 مىڭ تۇرعىن ساپالى ينتەرنەتپەن قامتاماسىز ەتىلەدى.