جاڭالىقتار
2,9 ترلن تەڭگە شىعىنى بولا تۇرا جوعارى سىياقىلار تولەگەن قتج-نىڭ ارەكەتى زاڭدى ما?
فوتو: rail-news.kz
كومپانيا باسشىلار ايىنا ورتا ەسەپپەن 4,1 ميلليون تەڭگە سىياقى العان. 2023 جىلى باسقارما مەن ديرەكتورلار كەڭەسى مۇشەلەرىنە جالاقىنى قوسا ەسەپتەگەندە جالپى سىياقى 790 ميلليون تەڭگەنى قۇراعانى تۋرالى اقپارات تارادى, دەپ حابارلايدى Skifnews.kz اقپارات پورتالى.
جاقىندا جوعارعى ەسەپ پالاتاسىنىڭ توراعاسى ءاليحان سمايىلوۆ ۇلتتىق تاسىمالداۋشىنىڭ بانكروتقا ۇشىراۋى مۇمكىن دەگەن سوزىنەن كەيىن «قازاقستان تەمىر جولى» كومپانياسى كومپانيانىڭ بۇگىنگى جاي-كۇيى تۋرالى ەسەپ بەردى.
كومپانيا قتج-نىڭ اعىمداعى نومينالدى قارىزى 2,9 ترلن تەڭگەنى قۇرايتىنىن راستادى, ايتۋلارىنشا, كومپانيانىڭ قارجىلىق جانە وپەراتسيالىق كورسەتكىشتەرى جىل سايىن جاقسارىپ كەلە جاتىر.
ءۇش جىل ىشىندە كومپانيانىڭ كىرىسى 2021 جىلعى 1,3 تريلليون تەڭگەدەن 2023 جىلى 2 تريلليون تەڭگەگە دەيىن تۇراقتى ءوسۋ ديناميكاسىن ساقتاپ وتىر. 2023 جىلدىڭ قورىتىندىسى بويىنشا كىرىسىمىز 134 ملرد تەڭگە بولدى, بۇل 2022 جىلمەن سالىستىرعاندا 4 ەسە ارتىق. بۇل – كومپانيانىڭ سوڭعى 10 جىلداعى ەڭ جاقسى كورسەتكىشى. سونىمەن بىرگە ول بارلىق نەسيەلىك مىندەتتەمەلەرىن ۋاقىتىندا وتەۋگە جەتەدى, – دەيدى كومپانيا.
Ulysmedia.kz سايتىنىڭ جازۋىنشا, كومپانيا ءوزىنىڭ قارجىلىق جاعدايىن تۇراقتى دەپ سانايدى, مۇنى حالىقارالىق رەيتينگتىك اگەنتتىكتەردىڭ كرەديتتىك رەيتينگتەرىنىڭ دەڭگەيى جانە قتج-عا نەسيەلىك جەڭىلدىكتەر مەن كەپىلدىكتەر بەرەتىن حالىقارالىق قارجى ينستيتۋتتارىنىڭ سەنىمى راستايتىنىن اتاپ وتكەن.
ال ءاليحان سمايىلوۆ جاريالاعان قتج ءاۋديتىنىڭ قورىتىندىسى بويىنشا جاعداي باسقاشا. ونىڭ ايتۋىنشا, بۇگىندە كومپانيا ءوز مىندەتتەمەلەرىن ورىنداي الماي وتىر, ول باسقارۋدىڭ ءتيىمسىز ءارى ەسكى فورماتىنان شىقپاسا, جاقىن ۋاقىتتا دەفولتقا ۇشىراۋى ابدەن مۇمكىن.
ءماجىلىس دەپۋتاتى ەرلان سايروۆ وسى تاقىرىپقا قاتىستى پىكىر ءبىلدىرىپ, «سامۇرىق-قازىنا» كومپانياسىنا ۇلكەن اۋديت جۇرگىزىلۋى ءتيىس ەكەنىن مالىمدەدى.
بۇگىنگى تاڭدا, وكىنىشكە قاراي, ءبىزدىڭ ەكونوميكالىق ساياساتىمىز اقساپ تۇر. ويتكەنى «سامۇرىق-قازىنا» قورىنىڭ قۇرامىنداعى كومپانيالار ەشكىمگە ەسەپ بەرمەيدى. ولار پرەمەر-مينيسترگە دە, سالالىق مينيسترگە دە ەسەپ بەرمەيدى. ولار ديرەكتورلار كەڭەسىنىڭ توراعاسىن تىڭدامايدى. بۇل ۇلتتىق كاسىپورىندار, ولاردىڭ باسشىلىعى قوماقتى سىياقى الىپ, سول ءۇشىن ءومىر سۇرەدى, – دەدى دەپۋتات.
مىنە, قتج قارىزى 2,9 ترلن.تەڭگە, ال كومپانيانىڭ توپ-مەنەدجەرلەرى سىياقى مەن بونۋس رەتىندە 790 ملن.تەڭگەنى قالتاعا باسقان. بۇل دەگەنىڭىز قارىزدىڭ تورتتەن ءبىرى باسشىلاردىڭ قالتاسىنا كەتتى دەگەن ءسوز. وسىنشالىق بىلىققا باتىپ وتىرعان كومپانيا اقشانى وڭدى-سوڭدى قالاي شاشادى?
بۇل سۇراققا كولىك ءمينيسترى مارات قاراباەۆ مينيسترلەر كابينەتىندە وتكەن بريفينگتە جاۋاپ بەردى.
ول ۇلتتىق كومپانياداعى پرەميا بەرۋ تۋرالى شەشىم دەربەس قارالاتىنىن ايتتى.
وسىعان سۇيەنە وتىرىپ, كومپانيا باسشىلىعى جانە ءبىرىنشى كەزەكتە ديرەكتورلار كەڭەسى پايدا اكەلۋگە ۇلەس قوسقان جەكەلەگەن قىزمەتكەرلەردى ماراپاتتاۋ تۋرالى شەشىم شىعاردى دەپ ويلايمىن. بۇل شارۋاشىلىق سۋبەكتىسى جانە ونىڭ قىزمەتى, ونىڭ ىشىندە پرەميا ماسەلەلەرى ونىڭ ەكونوميكالىق قىزمەتى بولىپ سانالادى. ال كومپانيا قاي قىزمەتكەرگە سىياقى تولەيتىنىن, قايسىسىنا تولەمەيتىنىن دەربەس شەشەدى, – دەدى مينيستر.
سونىمەن بىرگە قاراباەۆ قتج كومپانياسى 2020 جىلدان بەرى تابىستى كومپانيا دەپ سانايتىنىن اتاپ ءوتتى.
جولاۋشىلار مەن لوكوموتيۆ پاركتەرىن جاڭارتۋ بويىنشا بارلىق ءىرى جوبا ۇلتتىق كومپانيانىڭ ءوز ەسەبىنەن جۇزەگە اسىرىلادى. ءبىر بولىگىن مەملەكەت سۋبسيديالايدى. بۇل جولاۋشىلار تاسىمالىنا بويىنشا دا. ەندى بۇل نەسيە كولەمى 2,9 ترلن تەڭگە جىلجىمالى قۇرامدى جاڭارتۋعا جانە ءىرى ينفراقۇرىلىمدىق جوبالاردى جۇزەگە اسىرۋعا جۇمسالادى. بىراق وسى كۇنگە دەيىن قتج بىردە-ءبىر نەسيە بويىنشا دەفولتقا جول بەرگەن ەمەس. قتج-نىڭ بارلىق نەسيەسى ۋاقىتىندا وتەلدى. ونىڭ ۇستىنە كومپانيا 2020 جىلدان بەرى تابىستى بولدى. ال وتكەن 2023 جىلى كومپانيانىڭ بارلىق قارىزى مەن مىندەتتەمەلەرىن وتەگەننەن كەيىنگى تازا تابىسى 134 ملرد تەڭگەنى قۇرادى, – دەپ سەندىردى كولىك مينيسترلىگىنىڭ باسشىسى.
