2 ادام ولگەن, 30 ادام قاماۋعا الىنعان: Wildberries باس كەڭسەسىندەگى اتىس تۋرالى نە بەلگىلى?

كوللاج: kursiv.media

كومپانيانىڭ نەگىزىن قالاۋشى تاتيانا باكالچۋكتىڭ ايتۋىنشا, ونىڭ بۇرىنعى كۇيەۋى باستاعان ءبىر توپ ادام كەڭسەلەردى باسىپ الماق بولعان. بۇرىنعى كۇيەۋى ۆلاديسلاۆ باكالچۋك ءبىر توپ قارۋلى ادامدارمەن بىرگە كەڭسەگە كىرۋ ارەكەتىن جاساعان, دەپ حابارلايدى Qandastar.kz.

ونىڭ ايتۋىنشا, ءۇش ادام زارداپ شەككەن. ول بۇل جاعدايدى باقىلاۋعا الۋدى سۇراپ, قۇقىق قورعاۋ ورگاندارىنا اشىق تۇردە جۇگىنەتىنىن ايتتى.

الايدا ۆلاديسلاۆ باكالچۋك بۇل اقپاراتتى جوققا شىعاردى. ايتۋىنشا, Wildberries كەڭسەسىنە كەلىسسوزگە كەلگەن كەزدە وعان جانە ونىڭ كومانداسىنا بەلگىسىز ادامدار «شابۋىل جاساعان». تاتيانا باكالچۋك بولسا ەشقانداي دا كەلىسسوز جۇرگىزۋگە كەلىسپەگەنىن جەتكىزدى.

سوڭعى مالىمەتتەرگە جۇگىنسەك, اتىس سالدارىنان ەكى ادام قازا تاپقان. تاعى ەكى پوليتسيا قىزمەتكەرى جارالاندى. وقيعا بويىنشا 30 ادام ۇستالدى. كومپانيانىڭ ءباسپاسوز قىزمەتى حابارلاۋىنشا, قازا تاپقانداردىڭ ەكەۋى دە قاۋىپسىزدىك قىزمەتىندە جۇمىس ىستەگەن ادامدار.

ايتا كەتەيىك, Wildberries كومپانياسىنا قاتىستى داۋ باستالعالى بىرنەشە اي بولدى. ونىڭ قۇرىلتايشىلارى, ەرلى-زايىپتى تاتيانا مەن ۆلاديسلاۆ باكالچۋك اراسىندا اجىراسۋ پروتسەسى ءجۇرىپ جاتىر. ءتىپتى تاراپتاردىڭ ءبىرى شەشەنستان پرەزيدەنتى رامزان قادىروۆتان كومەك سۇرادى.