«20 jyl boıy saqtady». Bloger marqum Zamanbek Nurqadilovtiń ákesine syılaǵan altyn saǵatyn satatynyn aıtty

Foto: ashyó derekkóz

Qoǵam qaıratkeri Zamanbek Nurqadilovtiń 20 jyl boıy saqtalǵan altyn saǵaty aýkıonda satylmaq. Belgili bloger bul jaıly málimdedi. Satylymnan túsken paıdaǵa aýyl balalaryn óner-bilimge baýlıtyn mektep ashý josparyn da habarlady, dep habarlaıdy qandastar.kz KAZ.NUR.KZ portalyna siltep. 

Bloger Aqarys Ádiljan Instagram-daǵy paraqshasynda Zamanbek Nurqadilovtiń 20 jyl boıy saqtalǵan saǵatyn kórsetti. Ony 1999 jyly blogerdiń ákesine, akter Ulan Núsipjanǵa qaıratkerdiń ózi syılaǵan.

«1999 jyly Zamanbek aǵa men Maqpal apa Esik qalasynda demalystaryn ótkizip jatqan edi. Anam ol kezde maǵan ekiqabat eken. Ákem Zamanbek aǵamen amandasyp qaıtaıyn dep barǵan edi, Zamanbek aǵa qolyndaǵy altyn saǵatyn ákeme taǵyp, «Inim, myna saǵat sende bolsyn! Biraq satyp jiberme» dep syılyq jasaǵan eken. Birneshe kúnnen keıin Maqpal apa sol saǵattyń qorabyn, chek, saqtandyrý talondaryn ákeme ákelip beripti», – dep jazdy bloger.

Blogerdiń aıtýynsha, Nurqadilov qaıtys bolǵannan keıin otbasynda qıyn kezder bolsa da, ákesi saǵatty satpaǵan. Ákesi ony múldem taqpaǵan, «Aǵamnyń kózi» dep arnaıy saqtaǵan.

«2005 jyldan beri otbasymyzda qıyn kezder bolmady emes, boldy. Ákem aıtpaqshy, úıde qarapaıym qant ta bolmaǵan kezder boldy… Sol kezderde talaı kisiler «Zákeńniń saǵatyn bizge bálenbaı myń dollarǵa satshy» dep suraıtyn. Biraq ákem eshqashan saǵatty satý degen nusqany tipti oıyna almaıtyn!» – dedi bloger.

Aqarys Ádiljan Nurqadilovtiń syılyqty ákesine berý sebebin – ónerli aýyl balasyn qoldaǵannan dep túsindirdi. Sondyqtan qazir saǵatty aýkıonda, odan túsken aqshany aýyl balalaryn bilim men ónerge baýlıtyn mektepke jumsamaq.

«Zamanbek Nurqadilov meniń ákemdi jaqsy kóretin. Sebebi ákem, Narynqoldan kelgen aýyldyń balasy – ónerli bolatyn. Al Zamanbek aǵa aýyldyń ónerli balalaryn qoldaǵandy jaqsy kóretin», – deıdi Aqarys Ádiljan.