20 جىل بويى جاسىرىنىپ كەلگەن قازاقستاندىق رەسەيدەن ەكستراديتسيالاندى

قازاقستان رەسپۋبليكاسىنىڭ باس پروكۋراتۋراسى رەسەي فەدەراتسياسىنان اسا ءىرى مولشەردە ەسىرتكى زاتتارىنىڭ زاڭسىز اينالىمى مەن ولاردىڭ كونترابانداسى ءۇشىن قىلمىستىق جاۋاپتىلىققا تارتۋ ماقساتىندا قازاقستان ازاماتىن ەكستراديتسيالادى, دەپ حابارلايدى Qandastar.kz اقپارات پورتالى turkystan.kz سايتىنا سىلتەمە جاساپ.

ول 2003 جىلى وزبەكستاننان قازاقستان ارقىلى رەسەيگە گەروين مەن وپي جەتكىزۋمەن اينالىسقان قىلمىستىق توپتىڭ قۇرامىنا كىرگەن.

كۇدىكتى ەسىرتكىنى تاسىمالداۋ, ساقتاۋ جانە قىلمىستىق توپتىڭ باسقا مۇشەلەرىنە وتكىزۋ قىزمەتتەرىن اتقارعان.

2003 جىلى قىزىلوردا جانە قاراعاندى وبلىستارىندا جۇرگىزىلگەن ارنايى وپەراتسيالار بارىسىندا قىلمىسكەرلەردىڭ ءبىر بولىگى ۇستالىپ, ولاردان 35 كگ گەروين مەن 28 كگ وپي الىنعان.

ۇستالعان ادامدار كەيىن سوتتالعان, ال كۇدىكتى قۇقىق قورعاۋ ورگاندارىنان قاشىپ ۇلگەرىپ, حالىقارالىق ىزدەۋگە جاريالانعان.

20 جىل بويى ىزدەۋدە جۇرگەن ول وتكەن جىلدىڭ جەلتوقسانىندا رەسەيدىڭ سامارا وبلىسىندا ۇستالىپ, قازاقستان باس پروكۋراتۋراسىنىڭ سۇراۋى بويىنشا ەلگە ەكستراديتسيالاندى.

قازىرگى تاڭدا ول تەرگەۋ يزولياتورىنا قامالدى.

ايىپتالعان قىلمىستاردى جاساعانى ءۇشىن مۇلكى تاركىلەنىپ, 10 جىلدان 15 جىلعا دەيىن باس بوستاندىعىنان ايىرۋ جازاسى قاراستىرىلعان.