200 كۇن تۇرمەدە وتىرعان 16 جاسار بالا اقتالدى

فوتو: Orda.kz

ءوزىن-ءوزى قورعاعانى ءۇشىن سوتتالىپ, تۇرمەدە 200 كۇن وتكىزگەن 16 جاستاعى ەميل تراپەزنيكوۆ اقتالدى, دەپ جازادى qandastar.kz   Orda.kz-كە سۇيەنىپ.

6 قاراشادا جوعارعى سوت ەميلدى تولىق اقتاپ شىعاردى, سول كۇنى كەشكە ول تۋىستارىنىڭ ورتاسىندا بولدى. ءجاسوسپىرىم سابىرلى ءارى سەرگەك كورىندى, الايدا ونىڭ كوزىنەن 16 جاستاعى بالانىڭ كۇرت ەسەيگەنى بايقالدى.

«مەن ءۇشىن قاماۋدا وتكىزگەن وسى 6 اي جاقسى ساباق بولدى. ەندى بىردەڭە ىستەمەس بۇرىن مۇقيات ويلانۋ كەرەك ەكەنىن ءتۇسىندىم», – دەپ ەميل ءسال جىميىپ ايتتى.

ونىڭ ايتۋىنشا, ول بولعان مەكەمەلەردە (ەكى تەرگەۋ يزولياتورى جانە كامەلەتكە تولماعاندارعا ارنالعان كولونيا) جاعداي اسا ناشار بولماعان. «ابايسىزدا كىسى ولىمىنە سەبەپ بولۋ» بابى بويىنشا 1 جىل 6 اي جازاسىن وتەۋى كەرەك بولعان جەردە ارنايى كۇن ءتارتىبى بويىنشا كۇن وتكىزگەن ەكەن. سونىمەن قاتار, بوس ۋاقىتتارىندا تەلەديدار كورىپ نەمەسە PlayStation ويناۋعا مۇمكىندىك بولعان.

«ەميل باسىنان كەشكەندەردى وڭايلىقپەن ۇمىتا المايدى. ول مۇنى ءومىر بويى ەسىندە ساقتايدى. قازىر ءبىز ونى پسيحولوگقا بارۋعا كوندىرگىمىز كەلەدى, سەبەبى ونىڭ بويىندا ءالى دە قوبالجۋ بار», – دەدى ەميلدىڭ قورعاۋشىسى رەنا كەريموۆا.

سونداي-اق, ادۆوكاتتاردىڭ ايتۋىنشا, مەملەكەت كامەلەتكە تولماعان تراپەزنيكوۆتىڭ مورالدىق ازابىن وتەپ بەرۋى ءتيىس. جوعارعى سوتتىڭ قاۋلىسىن العاننان كەيىن قورعاۋشىلار مورالدىق زيان مەن ماتەريالدىق شىعىندى وتەۋ ءۇشىن تالاپ ارىز بەرۋدى جوسپارلاپ وتىر. قازىرگى ۋاقىتتا ناقتى سوما تۋرالى تۋىستارىمەن اقىلداسىپ جاتىر, ول شامامەن 10–15 ميلليون تەڭگە بولادى.