200 kún túrmede otyrǵan 16 jasar bala aqtaldy

Foto: Orda.kz

О́zin-ózi qorǵaǵany úshin sottalyp, túrmede 200 kún ótkizgen 16 jastaǵy Emıl Trapeznıkov aqtaldy, dep jazady qandastar.kz   Orda.kz-ke súıenip.

6 qarashada Joǵarǵy sot Emıldi tolyq aqtap shyǵardy, sol kúni keshke ol týystarynyń ortasynda boldy. Jasóspirim sabyrly ári sergek kórindi, alaıda onyń kózinen 16 jastaǵy balanyń kúrt eseıgeni baıqaldy.

«Men úshin qamaýda ótkizgen osy 6 aı jaqsy sabaq boldy. Endi birdeńe istemes buryn muqııat oılaný kerek ekenin túsindim», – dep Emıl sál jymıyp aıtty.

Onyń aıtýynsha, ol bolǵan mekemelerde (eki tergeý ızolıatory jáne kámeletke tolmaǵandarǵa arnalǵan kolonııa) jaǵdaı asa nashar bolmaǵan. «Abaısyzda kisi ólimine sebep bolý» baby boıynsha 1 jyl 6 aı jazasyn óteýi kerek bolǵan jerde arnaıy kún tártibi boıynsha kún ótkizgen eken. Sonymen qatar, bos ýaqyttarynda teledıdar kórip nemese PlayStation oınaýǵa múmkindik bolǵan.

«Emıl basynan keshkenderdi ońaılyqpen umyta almaıdy. Ol muny ómir boıy esinde saqtaıdy. Qazir biz ony psıhologqa barýǵa kóndirgimiz keledi, sebebi onyń boıynda áli de qobaljý bar», – dedi Emıldiń qorǵaýshysy Rena Kerımova.

Sondaı-aq, advokattardyń aıtýynsha, memleket kámeletke tolmaǵan Trapeznıkovtyń moraldyq azabyn ótep berýi tıis. Joǵarǵy sottyń qaýlysyn alǵannan keıin qorǵaýshylar moraldyq zııan men materıaldyq shyǵyndy óteý úshin talap aryz berýdi josparlap otyr. Qazirgi ýaqytta naqty soma týraly týystarymen aqyldasyp jatyr, ol shamamen 10–15 mıllıon teńge bolady.