2020 جىلدان باستاپ قازاقستاندىقتار قانداي مەديتسينالىق قىزمەتتەردى تەگىن الۋعا قۇقىلى

ەلىمىزدە 2020 جىلدىڭ 1 قاڭتارىنان باستاپ مەديتسينالىق قىزمەتتەر ەكى پاكەت شەڭبەرىندە ۇسىنىلادى.

ياعني, تەگىن مەديتسينالىق كومەكتىڭ كەپىلدىك بەرىلگەن كولەمى جانە مىندەتتى الەۋمەتتىك مەديتسينالىق ساقتاندىرۋ.

تەگىن مەديتسينالىق كومەكتىڭ كەپىلدىك بەرىلگەن كولەمى شەڭبەرىندە قر ازاماتتارى مەن قانداستار ساقتاندىرۋ مارتەبەسىنە قاراماستان, جەدەل كومەك, ساناۆياتسيا قىزمەتتەرىن, نەگىزگى كونسۋلتاتسيالىق-دياگنوستيكالىق قىزمەتتەر مەن باستاپقى مەديتسينالىق-سانيتارلىق كومەكتەردى الادى. سونىمەن قاتار ديناميكالىق باقىلاۋدى تالاپ ەتەتىن ارتەريالىق گيپەرتونيا, قانت ديابەتى سياقتى سوزىلمالى اۋرۋلار مەن تۋبەركۋلەز, ونكولوگيا, ايتۆ-ينفەكتسياسى كەزىندە ءدارى-دارمەكتەرمەن جانە مەديتسينالىق ماقساتتاعى بۇيىمدارمەن امبۋلاتورلىق قامتاماسىز ەتىلەدى.

ال ستاتسيونارلىق ەمدەۋدى جانە ديناميكالىق باقىلاۋدى تالاپ ەتەتىن سوزىلمالى ارتەريالىق گيپەرتونيا, قانت ديابەتى مەن تۋبەركۋلەز, ونكولوگيا, ايتۆ-ينفەكتسياسى كەزىندە كۇندىزگى ستاتسيونار جانە ۇيدەگى ستاتسيونار دەڭگەيىندە ەمدەۋ قىزمەتتەرىن الا الادى.

مىندەتتى الەۋمەتتىك مەديتسينالىق ساقتاندىرۋ اياسىندا دەنساۋلىق ساقتاۋ مينيسترلىگى بەكىتكەن تارتىپپەن جانە كەزەڭدىلىكپەن ون سەگىز جاسقا دەيىنگى بالالار جانە ون سەگىز جاستان اسقان ادامدار پروفيلاكتيكالىق مەديتسينالىق تەكسەرىستەن وتەدى.

تەگىن مەديتسينالىق كومەكتىڭ كەپىلدىك بەرىلگەن كولەمى شەڭبەرىندە ديناميكالىق باقىلاۋعا جاتپايتىن اۋرۋلارى بار ادامداردى بەيىندى ماماندار قابىلداپ, كونسۋلتاتسيا بەرەدى. ونىڭ ىشىندە مىنا قىزمەتتەر كورسەتىلەدى.

دياگنوستيكالىق قىزمەتتەر, قىمبات تۇراتىن اسپاپتىق زەرتتەۋلەر (كت, مرت جانە ت.ب.) جانە زەرتحانالىق دياگنوستيكا (يفت, پتر جانە ت.ب.) نەمەسە ماماننىڭ جولداماسى بويىنشا كورسەتكىشتەر بولعان جاعدايدا:

جوعارى تەحنولوگيالىق مەديتسينالىق قىزمەتتەردى قولدانۋ;

بەيىندى مامانداردىڭ مەديتسينالىق مانيپۋلياتسيالار مەن راسىمدەردى ورىنداۋ;

ستاتسيوناردى الماستىراتىن كومەك كورسەتۋ;

تمككك تىس دارىلىك زاتتار مەن مەديتسينالىق بۇيىمدار رەتسەپتىن جازۋ;

ەڭبەككە ۋاقىتشا جارامسىزدىق ءۇشىن ساراپتاما جاساۋ.

ال جۇكتى ايەلدەرگە جانە 18 جاسقا دەيىنگى بالالارعا, زەينەتكەرلەرگە, مۇگەدەكتەرگە جانە «التىن القا», «كۇمىس القا», «باتىر انا» كوپبالالى انالارعا شۇعىل ستوماتولوگيالىق كومەك جانە جۇكتى ايەلدەر مەن بالالارعا جوسپارلى ستوماتولوگيالىق كومەك كورسەتىلەدى.

بمسك مامانىنىڭ نەمەسە مەديتسينالىق ۇيىمنىڭ جولداماسى بويىنشا مەديتسينالىق وڭالتۋ جانە قالپىنا كەلتىرۋ ەمى ۇسىنىلادى.

تمككك كىرمەيتىن اۋرۋلاردىڭ پاتولوگواناتوميالىق دياگنوستيكاسى جاسالىپ, تمككك-دەن تىس ءدارى-دارمەكپەن قامتاماسىز ەتىلەدى.

سونىمەن قاتار, قازاقستاندىقتار ەمدەلۋشى قۇقىعى بۇزىلعان جاعدايدا 1406 ءنومىرى بويىنشا بايلانىس ورتالىعىنا قوڭىراۋ شالىپ, ءوتىنىش نەمەسە شاعىم بەرە الادى.

دەرەككوز: https://24.kz