جاڭالىقتار
2020 جىلى سپورتتى دامىتۋعا رەسپۋبليكالىق بيۋدجەتتەن 51 ملرد تەڭگە بولىنەدى
بۇگىن ۇلتتىق وليمپيادا كوميتەتتىڭ باس اسسامبلەياسىنىڭ وتىرىسىندا قر پرەمەر-ءمينيسترى اسقار مامين كەلەسى جىلى سپورتتى دامىتۋعا قانشا قارجى بولىنەتىنىن ايتتى.
«وزدەرىڭىز جاقسى بىلەسىزدەر, ەلباسى نۇرسۇلتان نازارباەۆتىڭ ستراتەگيالىق باعىتىنىڭ ارقاسىندا تاۋەلسىزدىك جىلدارى قازاقستاندىق سپورتشىلاردى دايىنداۋدىڭ ءتيىمدى جۇيەسى قۇرىلدى. العاش رەت 1994 جىلى نورۆەگيانىڭ ليللەحاممەر قالاسىندا وتكەن وليمپيادا ويىندارىنا قاتىسا باستاعان كەزەڭنەن بەرى ۇلتتىق قۇراما 71 مەدال جەڭىپ الدى. مەملەكەت باسشىسى قاسىم-جومارت توقاەۆ قازاقستان حالقىنا ارنالعان جولداۋىندا بۇقارالىق سپورتتى دامىتۋ مىندەتىن قويدى. بۇگىنگى كۇنى ەلىمىزدە دەنە شىنىقتىرۋ جانە سپورتپەن 5 ميلليونعا جۋىق ادام اينالىسادى», – دەدى اسقار مامين.
ۇكىمەت باسشىسى قازاقستاندا سپورتتى دامىتۋعا كوپ كوڭىل بولىنەتىنىن اتاپ ءوتتى.
«بيىل سپورتتى دامىتۋعا رەسپۋبليكالىق بيۋدجەتتەن 31 ميلليارد تەڭگە ءبولىندى. كەلەسى جىلى 51 ميلليارد تەڭگە جوسپارلانعان. بۇل تەك رەسپۋبليكالىق بيۋدجەتتەن, ءالى دە جەرگىلىكتى بيۋدجەتتەن قارجىلاندىرىلادى», – دەيدى ول.
BAQ.KZ ءتىلشىسى.
بەك تولەۋوۆ
