2024 جىلى قانداي ءتيىمدى يپوتەكالىق باعدارلاما ارقىلى ءۇي الۋعا بولادى

بۇگىندە بانكتەر ۇسىناتىن يپوتەكاعا تىكەلەي قۇرىلىس كومپانيالارىنان جانە قولدانىستاعى تۇرعىن ۇيلەردەن باسپانا ساتىپ الۋعا بولادى
قازاقستانداعى يپوتەكا نارىعىندا ءبىراز وزگەرىس بولدى. بىلتىر «نۇرلى جەر» مەملەكەتتىك باعدارلاماسىن جاۋىپ تاستادى. ونىڭ ورنىنا تۇرعىن ءۇي-كوممۋنالدىق ينفراقۇرىلىمدى دامىتۋدىڭ 2023-2029 جىلدارعا ارنالعان تۇجىرىمداماسى ىسكە قوسىلدى. سونىڭ اياسىندا الەۋمەتتىك يپوتەكا جاڭا ادىسپەن بەرىلە باستادى. ال كەلەسى ايدا تاعى ءبىر يپوتەكالىق باعدارلاما ىسكە قوسىلادى. قازاقستان 2024 جىلى باسپانانى ءتيىمدى يپوتەكانى راسىمدەۋ شارتتارىن زەردەلەپ شىقتى.
بانكتەردىڭ يپوتەكاسى ءتيىمدى مە
بۇگىندە بانكتەر ۇسىناتىن يپوتەكاعا تىكەلەي قۇرىلىس كومپانيالارىنان جانە قولدانىستاعى تۇرعىن ۇيلەردەن باسپانا ساتىپ الۋعا بولادى. ال ونداي يپوتەكانىڭ جىلدىق پايىزدىق مولشەرلەمەسى 18 پروتسەنتتەن باستالادى. بۇدان بولەك, قارىزدى راسىمدەۋ ءۇشىن كوميسسيا دا الۋى مۇمكىن.
باستاپقى جارناسىز يپوتەكا الۋ ءۇشىن جىلجىمايتىن م ۇلىكتى كەپىلگە قويۋ كەرەك. باسقا بىرەۋدىڭ اتىنداعى پاتەر نەمەسە جەكە ءۇي دە كەپىلزاتقا قابىلدانا بەرەدى. سوسىن ءۇيدىڭ لوكاتسياسىنا شەكتەۋ جوق. ماسەلەن, يپوتەكا استاناداعى پاتەرگە راسىمدەلسە, كەپىلزاتقا قازاقستاننىڭ باسقا ايماعىنداعى باسپانانى ۇسىنۋعا بولادى. بىراق ءۇيدىڭ باعاسى يپوتەكا سوماسىنىڭ 20 پروتسەنتىنەن كەم بولماۋى كەرەك.
يپوتەكانىڭ شەكتى سوماسى 100 ميلليون تەڭگەگە دەيىن بارادى. ال مولشەرلەمەسى يپوتەكانىڭ مەرزىمىنە قاراي ەسەپتەلەدى. يپوتەكا ۇزاق ۋاقىتقا راسىمدەلسە, مولشەرلەمەسى جوعارى بولادى. بىراق قارىز الۋشىنىڭ جاسى 60-تان اسپاۋى شارت.
قۇرىلىس كومپانيالارىنىڭ ۇسىنىسى قانداي
قازىرگى كەزدە قۇرىلىس كومپانيالارى دا سالىنىپ جاتقان جانە دايىن تۇرعىن ۇيلەردەن پاتەردى سان الۋان شارتتارمەن ساتىپ الۋعا مۇمكىندىك بەرەدى. ماسەلەن, استانادا كەيبىر ءىرى كومپانيالار 20 پروتسەنتتىك العاشقى جارنامەن ءۇيدى راسىمدەيدى. ال قالعان سومانى 6-240 ايدا جابۋ كەرەك. تولەمدى جاساۋ مەرزىمى ۇزارعان سايىن پروتسەنتتىك مولشەرلەمە وسەدى. ماسەلەن, سالىنىپ جاتقان ۇيگە قارىزدىڭ مولشەرلەمەسى 4,6 پروتسەنتتەن باستالادى.
12 اي – 4,6 پروتسەنت;
13-24 اي — 11 پروتسەنت;
25-36 اي – 14 پروتسەنت;
37-60 اي – 16,5 پروتسەنت;
61-120 اي – 18,5 پروتسەنت;
121-180 اي – 19 پروتسەنت;
181-19,5 اي – 19,5 پروتسەنت;
بىراق جىلدىق سىياقى مولشەرلەمەسى ءسال جوعارى بولادى. كەپىلگە ساتىپ الىناتىن ءۇيدىڭ ءوزى قويىلادى.
7-20-25
قازاقستاندا ءبىر عانا جەڭىلدەتىلگەن يپوتەكالىق باعدارلاما بار. ول – «7-20-25». وعان سايكەس, 7 پروتسەنتتىك كرەديتتى 20 پروتسەنت العاشقى جارنامەن 25 جىلعا الۋعا بولادى.
باعدارلاما تالاپتارى:
ءوتىنىم بەرگەن ادامنىڭ باسقا باسپاناسى بولماۋى كەرەك;
يپوتەكا تەك جاڭادان سالىنعان ۇيلەرگە بەرىلەدى, قۇجاتى دا بولۋى شارت;
باسپانانىڭ باعاسى شەكتى سومادان اسپاۋى ءتيىس (استانا, الماتى, اقتاۋ, اتىراۋ مەن شىمكەنتتە – 25 ميلليون تەڭگە, قاراعاندى مەن تۇركىستاندا – 20 ميلليون, باسقا ايماقتاردا 15 ميلليون تەڭگە);
7 پروتسەنتتىك يپوتەكانى ءبىر رەت قانا الۋعا بولادى.
بىلتىردان باستاپ بۇل باعدارلاماعا توقسان سايىن 100 ميلليارد تەڭگەدەن بولۋگە شەشىم قابىلداندى. ال ليميت تەز تاۋسىلىپ قالادى. بىراق ۇلتتىق بانك ءوز شەشىمىن وزگەرتپەيدى. سەبەبى باعدارلامانىڭ اقشاسىن بىردەن ءبولىپ بەرسە, باسپانا نارىعىندا سۇرانىس كۇرت كوتەرىلەدى. سالدارىنان باعا ءوسىپ كەتەدى.
قانداي جەڭىلدەتىلگەن يپوتەكالىق باعدارلامالار بار
بۇگىندە جەڭىلدەتىلگەن يپوتەكانى تەك وتباسى بانكىندە راسىمدەۋگە بولادى. بىراق ونى الۋ ءۇشىن ءتيىستى شارتتاردى ورىنداۋ كەرەك.
وتباسى بانكتە بىرنەشە يپوتەكالىق باعدارلاما بار. ولار – ء«وز ءۇيىم», «ۇماي». وڭىرلىك باعدارلامالار دا بار.
ماسەلەن, ء«وز ءۇيىم» بارلىق سالىمشىعا ارنالعان. ونىمەن 3,5 پروتسەنتتىك يپوتەكا الۋعا بولادى. بىراق ءۇش جىلدىڭ ىشىندە ءۇيدى ساتىپ الۋعا قاجەتتى قاراجاتتىڭ 50 پروتسەنتىن جيناۋ كەرەك. بۇدان بولەك, ارنايى باعالاۋ جۇيەسى بار. باعالاۋ كورسەتكىشى جىل سايىنعى سىياقى كولەمىمەن ەسەپتەلەدى. ەسەپشوتتا نەعۇرلىم كوپ اقشا بولسا, كورسەتكىش تە سوعۇرلىم جوعارى بولادى. تالاپ بويىنشا باعالاۋ كورسەتكىشى (وپ) 16 ۇپاي بولۋى قاجەت.
دەگەنمەن 20 پروتسەنتتىك باستاپقى جارنانى سالىپ, الدىن الا زايم الۋعا مۇمكىندىك بار. قالعان اقشانى بانك بەرەدى. بىراق نەسيە مولشەرلەمەسى 7 پروتسەنت بولادى. بىردەن 50 پروتسەنتىن قۇيعاندا ارالىق زايم بەرىلەدى. ونىڭ مولشەرلەمەسى دە 7%. بىراق ءۇش جىلدان كەيىن 5 پروتسەنتكە دەيىن تۇسەدى. يپوتەكا مەرزىمى: 6 اي – 25 جىل.
«ۇماي» يپوتەكاسى
«ۇماي» يپوتەكالىق باعدارلاماسى ايەلدەرگە ارنالعان. ونىمەن 30 ميلليون تەڭگەگە دەيىن نەسيە الۋعا بولادى. نەگىزگى شارتتارى:
نەسيە مولشەرلەمەسى — 13,5% (سىياقىنىڭ جىلدىق ءتيىمدى مولشەرلەمەسى 14,5%-تەن باستاپ), كەيىن 5%-كە دەيىن (سىياقىنىڭ جىلدىق ءتيىمدى مولشەرلەمەسى — 5,2%-تەن باستاپ) تومەندەتىلەدى;
قارىز الۋ مەرزىمى — 6 اي — 25 جىل ارالىعى.
تۇرعىن ءۇي تاڭداۋ جاعىنان شەكتەۋ جوق. بىراق قارىز الۋشىنىڭ اي سايىنعى وتباسىلىق تابىسى 550 000 تەڭگەدەن اسپاۋى كەرەك. ال وتباسىنىڭ ورتاق كىرىسى ايىنا 550 001 تەڭگەدەن 630 000 تەڭگەگە دەيىنگى ارالىقتا بولسا, تۇرعىن ءۇي 20 پروتسەنتتىك العاشقى جارنامەن بەرىلەدى. سونداي-اق, وسى باعدارلاما بويىنشا باسپانانى جوندەۋ جۇمىستارىنا دا 3,7 ميلليون تەڭگەگە دەيىنگى قارىز الۋ مۇمكىندىگى قاراستىرىلعان.
ەلوردا جاستارىنا ارنالعان باعدارلاما
بۇگىندە استانالىق جاستارعان ارنالعان «Elorda Jastary» تۇرعىن ءۇي باعدارلاماسى بار. وعان مەديتسينا, پەداگوگيكا, مادەنيەت, الەۋمەتتىك سالا, كوممۋنالدىق كاسىپورىندار, پوليتسيا, توتەنشە جاعداي قىزمەتى, جۋرناليستەر, جاتتىقتىرۋشىلار مەن سپورتشىلار قاتىسا الادى.
باعدارلاما قاتىسۋشىسى «وتباسى بانكتىڭ» سالىمشىسى بولۋى ءتيىس. ال ەسەپشوتىندا, كەم دەگەندە, 1,8 ميلليون تەڭگە بولۋى كەرەك. 35 جاسقا دەيىنگى (35 جاستى قوسا العاندا) ازاماتتاردىڭ قۇجاتتارى قابىلدانادى.
باعدارلاماسىنىڭ نەگىزگى شارتتارى:
قارىز سوماسى 18 ملن تەڭگەگە دەيىن;
جىلدىق مولشەرلەمەسى — 5% ;
باستاپقى جارنا 10%;
نەسيەلەۋ مەرزىمى 25 جىلعا دەيىن.
«قتك» اق كەپىلدىگى بولعان جاعدايدا باستاپقى/قايتالاما نارىقتارداعى پايدالانۋعا بەرىلگەن تۇرعىن ءۇي نە ۇلەستىك قاتىسۋ شارتى بويىنشا سالىنىپ جاتقان تۇرعىن ءۇيدى راسىمدەۋگە رۇقسات بار. قازىرگى كەزدە جۇمىس ىستەيتىن جاستارعا ارنالعان يپوتەكالىق باعدارلامالار باسقا ايماقتاردا دا قولعا الىندى.
9-20-25
كەلەسى ايدان باستاپ قازاقستاندا «9-20-25» يپوتەكالىق باعدارلاماسى ىسكە قوسىلادى. ونى دا وتباسى بانكى ارقىلى راسىمدەيدى.
وسى باعدارلاماعى رەسپۋبليكالىق بيۋدجەت پەن وتباسى بانكتەن اقشا بولىنەدى. سونىڭ اياسىندا قازاقستاندىقتار 9 پروتسەنتپەن 25 جىلعا جەڭىلدەتىلگەن يپوتەكا راسىمدەي الادى. باستاپقى جارنا – 20%.
ءوتىنىم بەرۋشىنىڭ اتىندا سوڭعى بەس جىلدا ءۇي بولماۋى شارت. وتباسى بانكىنىڭ باسشىسى لياززات يبراگيموۆانىڭ ايتۋىنشا, جۇمىس ىستەيتىن جاستارعا باسىمدىق بەرىلەدى. يپوتەكا دايىن ۇيگە جانە سالىنىپ جاتقان پاتەرلەرگە راسىمدەلەدى. جوسپارعا سايكەس, ءبىر جىلدا 8 مىڭ ادام جاڭا يپوتەكانى الا الادى.
كەزەكتە تۇرعاندارعا الەۋمەتتىك يپوتەكا قالاي بەرىلەدى
بىلتىردان باستاپ تۇرعىن ءۇي-كوممۋنالدىق ينفراقۇرىلىمدى دامىتۋدىڭ 2023-2029 جىلدارعا ارنالعان تۇجىرىمداماسى اياسىندا جەرگىلىكتى اتقارۋشى ورگانداردا باسپانا كەزەگىندە تۇرعان ازاماتتارعا الەۋمەتتىك يپوتەكا جاڭا ادىسپەن بەرىلەدى.
الەۋمەتتىك يپوتەكانىڭ شارتتارى:
العاشقى جارنا — 10%;
مولشەرلەمەسى – 2-5%;
نەسيە مەرزىمى — 20 جىلعا دەيىن.
2 پروتسەنتتىك يپوتەكا بىرنەشە ساناتقا بەرىلەدى:
1. I جانە II-ءشى توپتاعى مۇگەدەكتەر;
2.مۇمكىندىگى شەكتەۋلى بالالارى بار نەمەسە ولاردى تاربيەلەپ وتىرعان وتباسىلار;
3.جەتىم بالالار مەن اتا-اناسىنىڭ قامقورلىعىنسىز قالعان بالالار;
4. «التىن القا», «كۇمىس القا» القالارىمەن ماراپاتتالعان نەمەسە بۇرىن «باتىر انا» اتاعىن العان, سونداي-اق I جانە II دارەجەلى «انا داڭقى» وردەندەرىمەن ماراپاتتالعان كوپبالالى وتباسىلار, كوپبالالى انالار.
بارلىق سانات بويىنشا كىرىسكە شەكتەۋ قويىلمايدى. كرەديتتىڭ ەڭ جوعارعى سوماسى دا شەكتەلمەيدى. الەۋمەتتىك پاتەردىڭ ماكسيمالدى اۋدانى 80 شارشى مەتردەن اسپاۋى كەرەك.
مەملەكەتتىك باعدارلاماعا قاتىسۋ تۋرالى ءوتىنىم otbasybank.kz پورتالىندا ءاربىر ادامنىڭ تۇرعىلىقتى جەرى بويىنشا عانا قابىلدانادى.
ءۇي الۋعا اقشاسى جوق ادامدار نە ىستەيدى
بۇگىندە اكىمدىكتىڭ باسپانا كەزەگىندە تۇرعاندارعا جالدامالى پاتەرلەر بەرىلەدى. ونداي باسپانانىڭ اي سايىنعى تولەمى كوپ ەمەس. پاتەردى جالعا العان ادام كوممۋنالدىق شىعىنداردى دا تولەيدى.
بۇگىندە جالدامالى ۇيگە قاتىستى تاعى ءبىر باعدارلاما بار. وعان سايكەس, جالعا الىنعان ءۇيدىڭ جارتىسى مەملەكەت ەسەبىنەن وتەلەدى. وسى باعدارلاماعا الەۋمەتتىك جاعدايى تومەن ازاماتتار عانا قاتىسا الادى. ولار:
كوپبالالى وتباسىلار;
I جانە II توپتاعى مۇگەدەكتەر;
مۇگەدەك بالالار جانە اتا-انا قامقورلىعىنسىز قالعان بالالار.
ال نەگىزگى تالاپتاردىڭ ءبىرى – وتباسىنىڭ ءاربىر مۇشەسىنە شاققاندا تابىستىڭ كولەمى ەڭ تومەنگى كۇنكورىس دەڭگەيىنىڭ (36 018 تەڭگە) 1 ەسەلەنگەن شاماسىنان اسپاۋى كەرەك. ماسەلەن, ۇيدە ءتورت ادام بولسا, وتباسىنىڭ ءبىر ايلىق جالپى تابىسى 144 072 تەڭگەدەن (36 018×4) ارتىق بولماۋى شارت. وتىنىمدەر وتباسى بانكىندە قابىلدانادى.