جاڭالىقتار
2025 جىلدان باستاپ كىمدەردىڭ ءموبيلدى اۋدارىمدارى قاداعالانادى?
فوتو: depositphotos.com
بيىل جىل باسىنان باستاپ قازاقستاندىقتاردىڭ ءموبيلدى اۋدارىمدارىنا قاتاڭ باقىلاۋ ەنگىزىلدى. بۇل كاسىپكەرلەردى ءوز ءىسىن ادال جۇرگىزۋگە ۇيرەتتى. ال 2025 جىلى كىمدەردىڭ ءموبيلدى اۋدارىمدارى تەكسەرىلەدى? بۇل سۇراققا مەملەكەتتىك كىرىستەر كوميتەتى جاۋاپ بەرگەن بولاتىن. Massaget.kz تىلشىسى تۇسىندىرەدى.
كىمدەردىڭ ءموبيلدى اۋدارىمدارى باقىلاۋدا?
كوميتەت مالىمەتىنشە, بارلىق قازاقستان ازاماتىنىڭ ءموبيلدى اۋدارىمدارى قاتاڭ باقىلاۋعا الىنبايدى. مونيتورينگ ءۇش اي ىشىندە اي سايىن 100 جانە ودان دا كوپ ءتۇرلى جونەلتۋشىلەردەن قاراجات تۇسەتىن شوتتار بويىنشا جۇرگىزىلەتىنىن ناقتىلادى. بۇل كاسىپكەرلىك قىزمەتتىڭ بەلگىسى بولىپ سانالادى.
«تەك قولما-قول اقشاسىز ەسەپ ايىرىسۋ بويىنشا جۇمىس ىستەيتىن كاسىپكەرلەر باقىلاۋ سالاسىنان شىعارىلادى».
ءموبيلدى اۋدارىمداردى تەك جەكە ماقساتتا پايدالاناتىن جەكە تۇلعالار ءۇشىن شەكتەۋلەر جوق.
ايتا كەتەيىك, بۇزۋشىلىقتار انىقتالعان جاعدايدا ايىپپۇلداردان (15-تەن 50 اەك-كە دەيىن) دارا كاسىپكەر (جك) رەتىندە مىندەتتى تىركەۋگە دەيىن شارالار قابىلدانادى. مىسالى, جىلدىق تابىسى 12 ەڭ تومەنگى جالاقىدان اساتىن جەكە تۇلعالار كاسىپكەرلىك كودەكسكە سايكەس جەكە كاسىپكەردى تىركەۋگە مىندەتتى.
2025 جىلعا جوسپار
مكك 2023 جىلدان باستاپ بانكتەردەن مەملەكەتتىك قىزمەتكەرلەر مەن ولاردىڭ جۇبايلارىنىڭ اۋدارىمدارىن, ال بيىلدان باستاپ – كۆازيمەملەكەتتىك سەكتور قىزمەتكەرلەرىنىڭ اۋدارىمدارى تۋرالى دەرەكتەردى الا باستادى. 2025-2026 جىلدارعا قاراي مونيتورينگ جۇيەسىنە جك, زاڭدى تۇلعالاردىڭ باسشىلارى مەن قالعان حالىقتى قوسۋ جوسپارلانعان.
«كوپتەگەن كاسىپكەر قازىر سالىق مىندەتتەمەلەرىن ادال ورىنداۋ الدەقايدا ءتيىمدى ەكەنىن ءتۇسىندى. ءموبيلدى اۋدارىمدارعا باقىلاۋ ەنگىزىلگەننەن كەيىن كوپتەگەن ادام QR-كودتاردى نەمەسە بانك تەرمينالدارىن قولدانا باستادى», – دەپ حابارلادى مكك.
سونىمەن قاتار مكك ءۇش ەڭ تومەنگى جالاقىدان اساتىن اۋدارىمدار سوماسىنا ليميت ەنگىزۋ ارقىلى باقىلاۋ كريتەريلەرىن تولىقتىرۋدى جوسپارلاپ وتىرعانىن حابارلادى. بۇل جاسىرىن كاسىپكەرلىك قىزمەتتى انىقتاۋعا مۇمكىندىك بەرمەك.
ەسكە سالايىق, قازاقستاندىق ازاماتتاردىڭ موبيلدىك اۋدارىمدارى 2024 جىلدىڭ باسىنان بەرى تەكسەرىلەدى.
