2025 جىلى ەڭ تومەنگى جالاقى وسە مە?

كەلەر جىلى قازاقستاندا ەڭ تومەنگى جالاقى مولشەرى وسە مە? بۇل ماسەلەگە قاتىستى سۇراقتارعا ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا جاۋاپ بەردى, دەپ حابارلايدى qandastar.kz Skifnews.kz اقپارات پورتالىنا سىلتەمە جاساپ.

«بۇگىندە ەلىمىزدە ەڭ تومەنگى جالاقى 85 000 تەڭگە. كەلەر جىلى وسى 85 مىڭ تەڭگە كولەمىندە قالادى. ءبىز ەڭ تومەنگى جالاقىنى تاعايىنداۋ ادىستەمەسىن ازىرلەدىك. ول بويىنشا جاڭا ەڭبەك ءونىمى مەن مەدياندىق جالاقىنى بىرىكتىردىك. مەدياندىق ەڭبەكاقى مەن ەڭ تومەنگى جالاقى كورسەتكىشتەرىن سالىستىرساق 34% ايىرماشىلىق بار. ءبىز ەندى ءار جۇمىسشىنىڭ ەڭبەك تاۋەكەلدەرى كارتاسىن جاساپ, جۇمىس بەرۋشىلەرمەن بىرلەسىپ قاراستىرامىز. ارينە, جۇمىس بەرۋشى مەن جۇمىسشى اراسىندا كەلىسىمشارت جاسالادى, ول ەڭبەك كودەكسىنە نەگىزدەلەدى. بىراق, بيزنەس سالاسىنداعى كەيبىر جۇمىسشىلاردىڭ مەدياندىق ەڭبەكاقى مەن ەڭ تومەنگى جالاقى كورسەتكىشتەرى 9%-عا جەتپەيدى», – دەدى سۆەتلانا جاقىپوۆا ۇكىمەت وتىرىسىنان كەيىن وتكەن ءباسپاسوز ءماسليحاتىندا.

وسىلايشا مينيستر مەدياندىق جانە ەڭ تومەنگى جالاقى اراسىنداعى ايىرماشىلىقتى 9%-دان 34%-عا ارتتىرۋ جوسپارى بارىن ايتتى.