جاڭالىقتار
2026 جىلدان باستاپ كوپبالالى وتباسىلارعا سالىقتان جەڭىلدىك بولمايدى
كەلەسى جىلدان باستاپ كوپبالالى وتباسىلارعا سالىقتان جەڭىلدىك بەرىلمەيدى. قاڭتاردا كۇشىنە ەنەتىن جاڭا كودەكستە سالىق شەگەرىمدەرىنىڭ كوبى قىسقارىپ, تەك ءۇش ءتۇرى عانا قالدى. بۇل تۋرالى Qandastar.kz 31-ارنانىڭ ينفورمبيۋرو جاڭالىقتار قىزمەتىنە سىلتەمە جاساپ حابارلايدى.
بىراق كەلەسى جىلدان باستاپ بۇل جەڭىلدىك بولمايدى. ونى قاجەت دەپ ساناماعان دەپۋتاتتار ورنىنا بازالىق پەن الەۋمەتتىك تولەمدەردىڭ جانە الەۋمەتتىك سالىق شەگەرىمدەرى دەگەن 3 ءتۇرىن ەنگىزدى. ءبىرىنشى جەڭىلدىك جۇمىس ىستەيتىن بارلىق ازاماتقا بەرىلسە, قالعان ەكەۋى تەك ارنايى شوتى نەمەسە ستاتۋسى بارلارعا عانا ارنالعان.
“بازالىق سالىق شەگەرىمى 30 اەك (117 960 تەڭگە) مولشەرىندە قولدانىلادى, ياعني ول 14 اەك-تەن 30 اەك-كە دەيىن ۇلعايادى. الەۋمەتتىك تولەمدەردىڭ سالىقتىق شەگەرىمى مىندەتتى زەينەتاقى جارنالارى بويىنشا شەگەرىمدەردى, مىندەتتى الەۋمەتتىك مەديتسينالىق ساقتاندىرۋ جارنالارى جانە الەۋمەتتىك اۋدارىمدار بويىنشا شەگەرىمدەردى قامتيدى. الەۋمەتتىك سالىق شەگەرىمدەرىن ءبىرىنشى جانە ەكىنشى توپتاعى مۇگەدەكتىگى بار ادامدار 5000 اەك-كە (19 660 000 تەڭگە) دەيىنگى مولشەردە جانە ءۇشىنشى توپتاعى مۇگەدەكتىگى بار ادامدار, ۇلى وتان سوعىسى قاتىسۋشىلارى جانە وعان تەڭەستىرىلگەن ادامدار, مۇگەدەكتىگى بار بالانىڭ اتا-انالارىنىڭ ءبىرى, قامقورشىلارى 882 اەك (3 468 024 تەڭگە) قولدانا الادى”, – دەيدى الماتى قالاسى بويىنشا مەملەكەتتىك كىرىستەر دەپارتامەنتىنىڭ باسقارما باسشىسى ايجان بەككەۆا.
سالىق ورگانى وكىلدەرى بۇل وزگەرىستىڭ ناتيجەسىندە كەرىسىنشە سالىق سالىناتىن بازا تومەندەپ, قولعا تۇسەتىن جالاقى مولشەرى ارتاتىنىن ايتادى. ال ساراپشىلار باسقا پىكىردە.
“ايتارلىقتاي ەشتەڭە وزگەرمەدى. بۇرىن بولعان جەڭىلدىكتەردى 3 تۇرگە توپتاستىرا سالعان. ەسەسىنە حالىقتىڭ باسىم بولىگىن قامتىعان يپوتەكا سىياقىسىنا, اقىلى ءبىلىم مەن مەديتسينالىق شىعىنعا بەرىلگەن سالىق جەڭىلدىكتەرىنەن ايىرىلىپ وتىرمىز. سوندىقتان دا كوپتىڭ جالاقىسى كوبەيەدى دەۋگە كەلمەيدى”, – دەيدى سالىق ساراپشىسى ايدار ماساتباەۆ.
