جاڭالىقتار
2026 جىلعى «بولاشاقتىڭ ويىندارى» قازاقستاندا وتەدى
فوتو: قر تۋريزم جانە سپورت مينيسترلىگى
قازاقستان 2026 جىلعى ءداستۇرلى سپورت تۇرلەرى مەن كيبەرسپورتتى بىرىكتىرەتىن بىرەگەي تۋرنير – Phygital Games of the Future وتكىزۋ مۇمكىندىگىنە يە بولدى, دەپ حابارلايدى Qandastar.kz. بۇل ءتۋرنيردى وتكىزۋ قۇقىعىنا قازاقستاننان بولەك, پەرۋ مەن چيلي مەملەكەتتەرى ۇمىتكەر بولعان ەدى.
قر تۋريزم جانە سپورت مينيسترلىگىنىڭ حابارلاۋىنشا, قاتىسۋشىلار جارىستا فيزيكالىق جانە تسيفرلىق فورماتتاردى بىرىكتىرەتىن باعدارلامالاردا سىنعا تۇسەدى.
«بولاشاقتىڭ ويىندارىن» قازاقستاندا وتكىزۋ باستاماسىن پرەزيدەنت قاسىم-جومارت توقاەۆ 2024 جىلى قازان قالاسىندا وتكەن العاشقى ويىنداردىڭ اشىلۋ سالتاناتىندا ۇسىنعان ەدى. كەلەسى جىلعى تۋرنير ءباا-دە, ال 2026 جىلى استانادا وتەتىن بولىپ بەكىتىلدى.
«قازاقستاندا كيبەرسپورت قارقىندى دامىپ كەلەدى. 2018 جىلدان بەرى قازاقستان اۋماعىندا 140-تان استام كيبەرسپورت ءتۋرنيرى ۇيىمداستىرىلدى. وعان 40 مىڭنان اسا ادام قاتىستى. ءبىز «بولاشاقتىڭ ويىندارىن» ءساتتى وتكىزۋ ءۇشىن بارلىق كۇشىمىزدى سالامىز», – دەدى قر تۋريزم جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتى توراعاسىنىڭ مىندەتىن اتقارۋشى روللان سەرىكوۆ 2026 جىلى «بولاشاق ويىندارىن» ۇيىمداستىرۋشى ەلدىڭ جاريالانۋىنا ارنالعان ءىس-شارادا.
بۇعان دەيىن Phygital International وكىلدەرى ءتۋرنيردى قازاقستاندا وتكىزۋ مۇمكىندىگىن باعالاۋ ءۇشىن استاناعا كەلگەن ەدى. قازاقستان كيبەرسپورت فەدەراتسياسى 2026 جىلى استانادا وتەتىن «بولاشاقتىڭ ويىندارىنا» دايىندىقتى باستادى.
