21 جاستاعى ايەلىن اياۋسىز ولتىرگەن قىزىلوردالىق سوتتالدى

فوتو: اشىق دەرەككوز

قىزىلوردا وبلىسىندا ءوز جۇبايىن قاتىگەزدىكپەن ولتىرگەن ازاماتقا سوت ۇكىم كەستى, – دەپ حابارلايدى Qandastar.kz Almaty.tv تەلەارناسىنا سىلتەمە جاساپ.

جانتۇرشىگەرلىك جاعداي بيىل شىلدەدە شيەلى اۋدانى مايلىتوعاي ەلدىمەكەنىنە قاراستى مالشى اۋىلدا بولعان. ەكى كەشتىڭ ورتاسىندا ەرلى-زايىپتىلاردىڭ اراسىنداعى داۋ جانجالعا ۇلاسقان. كۇيەۋىنىڭ اياۋسىز سوققىسىنان سوڭ 21 جاستاعى ايەل وقيعا ورنىندا جان تاپسىردى.

«سوتتالۋشى زاڭدى نەكەدەگى ايەلىن «قوناق بولمەدە پلانشەتپەن بەلگىسىز اداممەن سويلەسىپ وتىرسىڭ» دەپ بولماشى نارسەنى جەلەۋ ەتىپ, اشۋعا بۋلىعىپ, قولىنداعى پلانشەتتى تارتىپ الادى. بولمەنىڭ قابىرعاسىنا ۇرىپ سىندىرادى. اعاش اس ستولىنىڭ اياعىن سىندىرىپ, قولىنا الىپ, باسىنان, دەنەسىنەن بىرنەشە رەت تەۋىپ, ۇرىپ-سوعىپ, جابىرلەنۋشىنى قاساقانا ولتىرگەن», – دەدى قىلمىستىق ىستەر جونىندەگى مامانداندىرىلعان اۋدانارالىق سوتىنىڭ ءباسپاسوز حاتشىسى گۇلدانا دوسان.

مارقۇمنىڭ جاقىندارىنىڭ سوزىنشە, ەر ادام جۇبايىن وسىعان دەيىن دە بىرنەشە مارتە ۇرىپ-سوققان. نەكەلەسكەنىنە جىلعا جۋىقتاعان جۇپتىڭ تۋىستارى ءتىل تابىسار دەگەن ۇمىتپەن زاڭ ورگاندارىنا جۇگىنبەگەن. الايدا اقىرى ورنى تولماس وكىنىشكە اكەلىپ وتىر.

«سوتتالۋشى جاڭاباي ءبىرجان جاڭاباي ۇلىنا قر قىلمىستىق كودەكستىڭ 99-بابىنىڭ 1-بولىگىمەن كىنالى دەپ تانىلىپ, 11 جىل مەرزىمگە باس بوستاندىعىنان ايىرۋ جازاسى تاعايىندالسىن. سوتتالۋشى جاڭاباي ءبىرجان جاڭاباي ۇلىنا قىلمىستىق كودەكستىڭ 60-بابى 1-بولىگىنىڭ تالابىنا سايكەس, قىزىلوردا قالالىق №2 سوتىنىڭ 22 اقپان 2024 جىلعى ۇكىمىمەن تاعايىندالعان باس بوستاندىعىنان شەكتەۋ جازاسىنىڭ وتەلمەگەن بولىگىنە ءىشىنارا قوسۋ ارقىلى تۇپكىلىكتى 12 جىل مەرزىمگە باس بوستاندىعىنان ايىرۋ جازاسى تاعايىندالسىن», – دەدى قىلمىستىق ىستەر جونىندەگى مامانداندىرىلعان اۋدانارالىق سوتىنىڭ سۋدياسى دۋمان اليەۆ.

«سوت مىرزا ىستەگەن ارەكەتىمە قاتتى وكىنەمىن. سول ءۇشىن بارىڭىزدەن شىن جۇرەكتەن كەشىرىم سۇرايمىن», – دەدى ءبىرجان جاڭاباي.

بۇل – ايىپتالۋشىنىڭ سوڭعى ءسوزى. 26 جاستاعى شيەلى اۋدانىنىڭ تۇرعىنى وسىعان دەيىن دە سوتتالعان. ءتىپتى باس بوستاندىعىنان شەكتەۋ جازاسى ءالى اياقتالماعان. ەرلى-زايىپتىلاردىڭ اراسىنداعى نەكەدەن قالعان 1 جاسار ءبۇلدىرشىندى سوت شيەلى اۋداندىق ءبىلىم ءبولىمى جانىنداعى قامقورشىلىق ۇيىمىنىڭ قاراۋىنا بەرۋدى شەشكەن. ال مارقۇمنىڭ اناسى بەيكۇنا ءسابيدى ءوز قولىما السام دەيدى.

«قىزىمدى جەرلەدىم, سول كۇنى كىشكەنتاي قىزدى الىپ كەلدىم. سودان بەرى قىزىم قولىمدا. ونى شيەلى اۋداندىق قامقورشى ۇيىنە بەرۋ تۋرالى شەشىم شىعارىپ قويدى. مەن وعان كەلىسپەيمىن. قىزىمنان ايىرىلدىم, ونىڭ بالاسىنان ايىرىلعىم كەلمەيدى», – دەدى جابىرلەنۋشىنىڭ اناسى سالتانات ىرسالديەۆا.

مارقۇمنىڭ بۇرىنعى نەكەدەن تۋعان 3 جاسار قىزى قازىر ناعاشى اجەسىنىڭ قولىندا. نەمەرەسىنىڭ تاعدىرىنا الاڭداعان انا جەتىم قالعان جازىقسىز جانداردى بىرگە وسىرسەتىنىن ايتتى. سابيگە قاتىستى ءىستى قايتا قاراۋعا ءوتىنىم بەرمەك.