21 jastaǵy áıelin aıaýsyz óltirgen qyzylordalyq sottaldy

Foto: ashyq derekkóz

Qyzylorda oblysynda óz jubaıyn qatygezdikpen óltirgen azamatqa sot úkim kesti, – dep habarlaıdy Qandastar.kz Almaty.tv telearnasyna silteme jasap.

Jantúrshigerlik jaǵdaı bıyl shildede Shıeli aýdany Maılytoǵaı eldimekenine qarasty malshy aýylda bolǵan. Eki keshtiń ortasynda erli-zaıyptylardyń arasyndaǵy daý janjalǵa ulasqan. Kúıeýiniń aıaýsyz soqqysynan soń 21 jastaǵy áıel oqıǵa ornynda jan tapsyrdy.

«Sottalýshy zańdy nekedegi áıelin «qonaq bólmede planshetpen belgisiz adammen sóılesip otyrsyń» dep bolmashy nárseni jeleý etip, ashýǵa býlyǵyp, qolyndaǵy planshetti tartyp alady. Bólmeniń qabyrǵasyna uryp syndyrady. Aǵash as stolynyń aıaǵyn syndyryp, qolyna alyp, basynan, denesinen birneshe ret teýip, uryp-soǵyp, jábirlenýshini qasaqana óltirgen», – dedi Qylmystyq ister jónindegi mamandandyrylǵan aýdanaralyq sotynyń baspasóz hatshysy Gúldana Dosan.

Marqumnyń jaqyndarynyń sózinshe, er adam jubaıyn osyǵan deıin de birneshe márte uryp-soqqan. Nekeleskenine jylǵa jýyqtaǵan juptyń týystary til tabysar degen úmitpen zań organdaryna júginbegen. Alaıda aqyry orny tolmas ókinishke ákelip otyr.

«Sottalýshy Jańabaı Birjan Jańabaıulyna QR Qylmystyq kodekstiń 99-babynyń 1-bóligimen kináli dep tanylyp, 11 jyl merzimge bas bostandyǵynan aıyrý jazasy taǵaıyndalsyn. Sottalýshy Jańabaı Birjan Jańabaıulyna Qylmystyq kodekstiń 60-baby 1-bóliginiń talabyna sáıkes, Qyzylorda qalalyq №2 sotynyń 22 aqpan 2024 jylǵy úkimimen taǵaıyndalǵan bas bostandyǵynan shekteý jazasynyń ótelmegen bóligine ishinara qosý arqyly túpkilikti 12 jyl merzimge bas bostandyǵynan aıyrý jazasy taǵaıyndalsyn», – dedi Qylmystyq ister jónindegi mamandandyrylǵan aýdanaralyq sotynyń sýdıasy Dýman Álıev.

«Sot myrza istegen áreketime qatty ókinemin. Sol úshin bárińizden shyn júrekten keshirim suraımyn», – dedi Birjan Jańabaı.

Bul – aıyptalýshynyń sońǵy sózi. 26 jastaǵy Shıeli aýdanynyń turǵyny osyǵan deıin de sottalǵan. Tipti bas bostandyǵynan shekteý jazasy áli aıaqtalmaǵan. Erli-zaıyptylardyń arasyndaǵy nekeden qalǵan 1 jasar búldirshindi sot Shıeli aýdandyq bilim bólimi janyndaǵy qamqorshylyq uıymynyń qaraýyna berýdi sheshken. Al marqumnyń anasy beıkúná sábıdi óz qolyma alsam deıdi.

«Qyzymdy jerledim, sol kúni kishkentaı qyzdy alyp keldim. Sodan beri qyzym qolymda. Ony Shıeli aýdandyq qamqorshy úıine berý týraly sheshim shyǵaryp qoıdy. Men oǵan kelispeımin. Qyzymnan aıyryldym, onyń balasynan aıyrylǵym kelmeıdi», – dedi jábirlenýshiniń anasy Saltanat Yrsaldıeva.

Marqumnyń burynǵy nekeden týǵan 3 jasar qyzy qazir naǵashy ájesiniń qolynda. Nemeresiniń taǵdyryna alańdaǵan ana jetim qalǵan jazyqsyz jandardy birge ósirsetinin aıtty. Sábıge qatysty isti qaıta qaraýǵa ótinim bermek.