جاڭالىقتار
«21 جەردەن پىشاق سالعان»: سەمەيدە جاس جىگىتتى ازاپتاپ ولتىرگەن تۇرعىن سوتتالدى
سەمەيدە 22 جاستاعى جىگىتتى ازاپتاپ ولتىرگەن تۇرعىن سوتتالدى. سۋديا قاندى قىلمىستى جاسادى دەگەن كۇدىكتىنى 12 جىلعا باس بوستاندىعىنان ايىردى. بىراق بۇل ۇكىممەن جابىرلەنۋشى تاراپ كەلىسپەي وتىر, دەپ حابارلايدى qandastar.kz اقپارات پورتالى كتك ارناسىنا سىلتەمە جاساپ.
«قىلمىسىكەرگە اسا جوعارى جازا بەرىلگەن جوق . ءبىز بىرنەشە رەت تالاپ-ءوتىنىش جازعانبىز.ياعني اسا جوعارى جازا بەرۋگە . وكىنىشكە قاراي, تەرگەۋ ءىسى دە, سوت تەرگەۋ ءىسى دە قاناعاتتاندىرمادى. ەندى ءبىز اپەللياتسياعا بەرىپ, ارى قاراي ادىلدىكتىڭ, شىندىقتىڭ تۇبىنە جەتۋگە دايىنبىز», – دەدى مارقۇمنىڭ اپكەسى شولپان مۇحامەدجانوۆا.
سۇمدىق وقيعا جىل باسىندا ءۇرجار اۋدانىندا بولعان. جەرگىلىكتى تۇرعىنداردىڭ ءبىرى تۇندە دۇكەننىڭ الدىندا ادام ءولىپ جاتقانىن كورىپ جەدەل جاردەم شاقىرتقان. 22 جاستاعى راحات رايبەكتى اياۋسىز پىشاقتاپ كەتكەن ەكەن. مارقۇمنىڭ تۋىستارى ءبىر ءۇيدىڭ جالعىز ۇلىنا 21 جەردەن پىشاق سالعان دەيدى. كەيىن وسىنداي ايۋاندىققا باردى دەگەن كۇدىكپەن جەرگىلىكتى تۇرعىنداردىڭ ءبىرى ۇستالدى.
سۋديا جالعان كۋاگەر بولعانداردىڭ ءبارىن جاۋاپقا تارتۋ تۋرالى دا شەشىم شىعاردى. سونداي-اق اسكەري كوميسسارياتقا دا تەكسەرىس جۇرگىزىلەتىن بولادى. سەبەبى, قارا جامىلعان وتباسى ايعاقتاردى جويۋعا كومەكتەسكەندەردىڭ بارلىعىن جاۋاپقا تارتۋدى تالاپ ەتكەن. ال سوتتالۋشى جازاسىن قاۋىپسىزدىگى ورتاشا مەكەمەدە وتەمەك.
«قانات سامات ۇلى پۇشپاقپاەۆ, قر قك 99-بابىنىڭ 1-بولىگىنە ساي قىلمىس جاساعانى ءۇشىن كىنالى دەپ تانىلىپ, 12 جىلعا باس بوستاندىعىنان ايىرىلسىن. قر قك 46-بابى, 5-بولىگىنىڭ 2-تارماعىنا سايكەس, جازاسىن قىلمىستىق اتقارۋ جۇيەسىنىڭ ورتاشا قاۋىپسىز مەكەمەسىندە وتەسىن», – دەدى سوت ۇكىمىن وقىعان سۋديا ايجان بەسەەۆا.
