تۇركىستان وبلىسىندا «جاقسىلار, داستان ايتايىن» اتتى جاس جىرشىلاردىڭ بايقاۋى ءوتتى, دەپ حابارلايدى قازاقپارات.
جىر سايىسىنا اۋدان-قالالاردان ىرىكتەلگەن 47 وقۋشى قاتىستى قازاقستان رەسپۋبليكاسىنىڭ تۇڭعىش پرەزيدەنتى ن.ءا.نازارباەۆتىڭ «بولاشاققا باعدار: رۋحاني جاڭعىرۋ», « ۇلى دالانىڭ جەتى قىرى» ماقالالارىندا جۇكتەلگەن مىندەتتەردى جۇزەگە اسىرۋ ماقساتىندا ۇيىمداستىرىلعان شاراعا وبلىس اكىمدىگى ۇيىتقى بولدى.
جيىننىڭ اشىلۋ سالتاناتىندا ءسوز العان وبلىس اكىمىنىڭ ورىنباسارى ساكەن قالقامانوۆ ۇلتتىق مۇرامىزدى ۇلىقتاپ, ۇلتتىق رۋحتى اسقاقتاتار شارانىڭ ماڭىزدىلىعىنا توقتالدى. ال, وبلىستىق اقساقالدار القاسىنىڭ توراعاسى جارىلقاسىن ازىرەتبەرگەنوۆ اق باتاسىن بەرىپ, قاتىسۋشىلارعا ساتتىلىك تىلەدى.
ەكى جىل بۇرىن باستالعان جوبا بارىسىندا قاتىسۋشىلار «قامبار باتىر» مەن «الپامىس باتىر» داستانىن ايتىپ جىرلاسا, بيىل بالالار «قوبىلاندى باتىر» جىرىن جاتقا ايتۋعا تىرىستى. 9 اي بويىنا 264 بەتتەن تۇراتىن جىردى جاتتاپ, ءوز ونەرلەرىن ورتاعا سالدى.
ەكىنشى كەزەڭدە جىر ىشىندەگى جەكەلەگەن وقيعالار مەن جەر-سۋ اتاۋلارىنا قاتىستى سۇراقتارعا جاۋاپ بەرىپ, ءۇشىنشى كەزەڭدە جىرداعى كونەرگەن, تاريحي سوزدەردىڭ ماعىناسىن اشىپ ءتۇسىندىردى. بايقاۋ قورىتىندىسىندا سوزاق اۋدانىنداعى ق.رۇستەموۆ اتىنداعى جالپى ورتا مەكتەبىنىڭ وقۋشىسى وسەر تۇران ۇزدىك ونەر كورسەتىپ, 1 ملن تەڭگەگە يە بولدى.
جەڭىمپازدى سايىسقا دايىنداعان ۇستازى اسىلزات امەتوۆا 2 ملن تەڭگەنىڭ سىياقىسىنا يە بولدى. سونداي-اق, ەكىنشى ورىن دا سوزاقتىق وقۋشىعا بۇيىردى. ءا.ناۋايى اتىنداعى جالپى ورتا مەكتەبىنىڭ 8 سىنىپ وقۋشىسى ءرابيا شالتاي ەكىنشى ورىننىڭ تۇعىرىنا كوتەرىلىپ, 600 مىڭ تەڭگەگە يە بولسا, ۇستازى جازيرا سانكىباەۆا 1 ملن 600 مىڭ تەڭگە الدى.
