جاڭالىقتار
«22 ملن تەڭگە»: سەمەي ماڭىندا قۇنى پاتەرمەن بىردەي دارەتحانا ءالى جۇمىس ىستەمەي تۇر
بەينەجازبادان الىنعان كادر
تراسساداعى 22 ملن تەڭگەنىڭ VIP دارەتحاناسى ءالى جارامسىز.
SMARTNEWS.KZ باسىلىمىنىڭ حابارلاۋىنشا, اباي وبلىسىنداعى تاس جول بويىنا دارەتحانا سالىندى. الايدا ءالى ىسكە قوسىلماعان نىسان قازىردىڭ وزىندە قيراپ تۇر. بۇل تۋرالى KTK تەلەارناسى مالىمدەدى.
تەلەارنا حابارلاۋىنشا, سەمەي ماڭىندا قۇنى پاتەر باعاسىمەن بىردەي بوس تۇرعان اجەتحانا بار. ول بىلتىر تاس جولعا ورناتىلدى, بىراق نىسان ءالى جۇمىس ىستەمەي, قۇلاي باستاعان. تەلەارنا دارەتحاناعا كەلۋشىلەردىڭ ءبىرىنىڭ ۆيدەوسىن ءبولىسىپ, ونىڭ ءالى جۇمىس ىستەمەيتىنىن كورسەتتى.
«اباي وبلىسىندا 22 ميلليونعا قوعامدىق دارەتحانا سالىندى, جۇمىسشىلار بار, بىراق دارەتحانانىڭ ءوزى جۇمىس ىستەمەيدى», – دەيدى ۆيدەو اۆتورى.
تۇرعىندار مەن قوعام بەلسەندىلەرى جول بويىنداعى دارەتحانانىڭ باعاسىن قالاداعى جايلى پاتەرمەن سالىستىرۋعا بولادى دەگەن ويدا. شەنەۋنىكتەر بولسا تۋريستەر مەن تاسىمالداۋشىلارعا ىڭعايلى بولۋ ءۇشىن تىرىسقانىن ايتادى. ولار بىردەن ەكى مودۋلدىك نىسان ورناتىپ مۇمكىندىگى شەكتەۋلى جاندارعا جاعداي جاساعان. ۆانداليزمگە قارسى دارەتحانالار مەن راكوۆينالار, بەينەباقىلاۋ كامەرالارى, جىلىتۋ, كونديتسيونەر جانە سۋمەن قامتاماسىز ەتىلدى.
الايدا مۇنىڭ ءبارى ءالى ىسكە قوسىلعان جوق. بۇل جاعدايعا اباي وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ ءباسپاسوز حاتشىسى اسەم نۇرلانقىزى تۇسىنىكتەمە بەردى.
«بۇگىنگى كۇنى مودۋلدىك نىسان قوسىمشا دايىندىق جۇمىستارىنا بايلانىستى ۋاقىتشا جۇمىس ىستەمەي تۇر, نىسان پايدالانۋعا بەرىلگەنگە دەيىن مەردىگەردىڭ باقىلاۋىندا», – دەدى نۇرلانقىزى.
