«22 mln teńge»: Semeı mańynda quny pátermen birdeı dárethana áli jumys istemeı tur

beınejazbadan alynǵan kadr

Trassadaǵy 22 mln teńgeniń VIP dárethanasy áli jaramsyz.

SMARTNEWS.KZ basylymynyń habarlaýynsha, Abaı oblysyndaǵy tas jol boıyna dárethana salyndy. Alaıda áli iske qosylmaǵan nysan qazirdiń ózinde qırap tur. Bul týraly KTK telearnasy málimdedi.

Telearna habarlaýynsha, Semeı mańynda quny páter baǵasymen birdeı bos turǵan ájethana bar. Ol byltyr tas jolǵa ornatyldy, biraq nysan áli jumys istemeı, qulaı bastaǵan. Telearna dárethanaǵa kelýshilerdiń biriniń vıdeosyn bólisip, onyń áli jumys istemeıtinin kórsetti.

«Abaı oblysynda 22 mıllıonǵa qoǵamdyq dárethana salyndy, jumysshylar bar, biraq dárethananyń ózi jumys istemeıdi», – deıdi vıdeo avtory.

Turǵyndar men qoǵam belsendileri jol boıyndaǵy dárethananyń baǵasyn qaladaǵy jaıly pátermen salystyrýǵa bolady degen oıda. Sheneýnikter bolsa týrıster men tasymaldaýshylarǵa yńǵaıly bolý úshin tyrysqanyn aıtady. Olar birden eki modýldik nysan ornatyp múmkindigi shekteýli jandarǵa jaǵdaı jasaǵan. Vandalızmge qarsy dárethanalar men rakovınalar, beınebaqylaý kameralary, jylytý, kondııoner jáne sýmen qamtamasyz etildi.

Alaıda munyń bári áli iske qosylǵan joq. Bul jaǵdaıǵa Abaı oblystyq jolaýshylar kóligi jáne avtomobıl joldary basqarmasynyń baspasóz hatshysy Ásem Nurlanqyzy túsinikteme berdi.

«Búgingi kúni modýldik nysan qosymsha daıyndyq jumystaryna baılanysty ýaqytsha jumys istemeı tur, nysan paıdalanýǵa berilgenge deıin merdigerdiń baqylaýynda», – dedi Nurlanqyzy.