جاڭالىقتار
«227 ملن تەڭگە جينالدى»: ەربايان مۇحتاردى تۋىستارى گەرمانياعا ەمدەۋگە اپارماق
فوتو: www.instagram.com/erbayan2024/
قازاقستاندىقتار اۋىر حالدە جاتقان سارباز ەربايان مۇحتاردىڭ ەمى ءۇشىن قاراجات جيناۋدى جالعاستىرۋدا.
بۇگىن ونىڭ ەكگ, جۇرەك ەحو-كارديوگرافياسى جانە وكپە رەنتگەنى سياقتى مەديتسينالىق تەكسەرىستەرى بەلگىلەنگەن. دارىگەرلەر ەرباياننىڭ ۇزاق ۋاقىت ارقاسىمەن جاتۋى قان تامىرلارىنا جۇكتەمە ءتۇسىرىپ, وكپەدە توقىراۋلى پنەۆمونيانىڭ بار-جوعىن انىقتاۋى كەرەك, دەپ حابارلايدى qandastar.kz.بۇل تۋرالى ەرباياننىڭ Instagram پاراقشاسىندا بەلگىلى بولدى.
ەرباياننىڭ دەنەسى ۇزاق ساپارعا دايىن بولۋى قاجەت. جاقىن ارادا ونىڭ تۋىستارى گەرمانيا ەلشىلىگىنە بارىپ, قابىلداۋعا ءوتىنىش بەرۋدى جوسپارلاپ وتىر. ەرباياننىڭ اتا-اناسى جاقىن ارادا ۇشۋعا دايىندىق رەتىندە وزدەرىنە پاسپورت جاساتۋدى قولعا الۋدا.
ازىرگە ەرباياننىڭ مەديتسينالىق قۇجاتتارى اعىلشىن تىلىنە اۋدارىلماعان, بىراق ولار بىرنەشە الەمدىك كلينيكالارعا, سونىڭ ىشىندە گەرمانياداعى كلينيكالارعا دا جىبەرىلگەن. جاۋاپ كۇتىلۋدە, ەمدەۋ سوماسى ءالى بەلگىسىز, سەبەبى كلينيكا ءالى تاڭدالعان جوق.
ەسكە سالايىق, وتكەن جىلدىڭ جەلتوقسان ايىندا اسكەري قىزمەتشى ەربايان مۇحتار كوماعا تۇسكەن بولاتىن. اسكەري بولىمدەگىلەر ونىڭ اجەتحانادا قۇلاپ, باسىن پليتكاعا سوعىپ العانىن ايتىپ, بۇل وقيعانى جازاتايىم جاعداي دەپ تۇسىندىرگەن. الايدا تۋىستارى بۇل نۇسقانى قابىلدامادى. ەربايان باس سۇيەك-مي جاراقاتىن العان, ول الماتى قالاسىنداعى 5571 اسكەري ءبولىمىنىڭ ۇلتتىق گۆاردياسىندا قىزمەت ەتكەن.
