جاڭالىقتار
25 مىڭنان استام قازاقستاندىقتىڭ جالاقىسى وسەدى
سۋ رەسۋرستارى جانە يرريگاتسيا مينيسترلىگى ازىرلەگەن سۋ شارۋاشىلىعى قىزمەتكەرلەرىنىڭ جالاقىسىن ەنەرگەتيكا سالاسى ماماندارىنىڭ دەڭگەيىنە دەيىن كوتەرۋدى كوزدەيتىن «تابيعي مونوپوليالار تۋرالى» زاڭعا ەنگىزىلگەن تۇزەتۋلەر كۇشىنە ەندى, دەپ حابارلايدى Qandastar.kz
قازىر سۋ رەسۋرستارى جانە يرريگاتسيا مينيسترلىگى مەن ۇلتتىق ەكونوميكا مينيسترلىگى وسى زاڭدى ىسكە اسىرۋعا باعىتتالعان نورماتيۆتىك-قۇقىقتىق اكتىلەردى تىركەۋ جۇمىستارىن جۇرگىزىپ جاتىر. ايتا كەتەيىك, سۋ شارۋاشىلىعى قىزمەتكەرلەرىنىڭ جالاقىسى بيىل قىركۇيەكتەن باستاپ ارتادى.
جالپى, ەل بويىنشا سۋمەن جابدىقتاۋ جانە سۋ بۇرۋ قىزمەتتەرىن كورسەتەتىن 25 مىڭنان استام قىزمەتكەردىڭ جالاقىسى وسەدى. ايماقتارعا بايلانىستى جانە رەسمي ستاتيستيكالىق مالىمەتتەرگە سايكەس, ەڭبەكاقى ورتا ەسەپپەن 35-50%-عا كوبەيەدى.
بۇل تۇزەتۋلەردى ازىرلەۋ بىلتىر باستالعان بولاتىن. بيىل ماۋسىم ايىندا زاڭ جوباسىنا مەملەكەت باسشىسى قول قويدى.
«مينيسترلىك سۋ شارۋاشىلىعى سالاسى ماماندارىنىڭ مارتەبەسىن كوتەرۋ مەن ەڭبەك جاعدايىن جاقسارتۋعا ەرەكشە ءمان بەرەدى. مىسالى, بيىل «قازسۋشاردىڭ» بارلىق 425 ماۋسىمدىق جۇمىسشىسى تۇراقتى جۇمىسپەن قامتىلدى. سونداي-اق سۋ ماماندارىنىڭ بىلىكتىلىگىن ارتتىرۋ بويىنشا اۋقىمدى جۇمىس جۇرگىزىلىپ جاتىر, ونىڭ ىشىندە شەتەلدەردە دە وقىتۋ قاراستىرىلعان. قابىلدانعان بارلىق شارا رەسپۋبليكاداعى سۋ قاۋىپسىزدىگىن قامتاماسىز ەتۋدە ەڭبەك ەتىپ جۇرگەن ازاماتتاردىڭ مارتەبەسىن كوتەرۋدە ەلەۋلى پروگرەسكە قول جەتكىزۋگە مۇمكىندىك بەردى», – دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
سۋ سالاسى ماماندارىنىڭ جالاقىسىن ارتتىرۋ شارالارى بىلتىر دا جۇزەگە اسقان بولاتىن. 2024 جىلى «قازسۋشار» رمك قىزمەتكەرلەرىنىڭ ەڭبەكاقىسى 25 پايىزعا كوبەيتىلدى.
