25 جاسقا تولماعان ازاماتتارعا قۇمار ويىن ويناۋعا تىيىم سالىندى

ال ەلىمىزدە 25 جاسقا تولماعان ازاماتتارعا قۇمار ويىن ويناۋعا ەندى زاڭمەن تىيىم سالىنادى. ونلاين كازينو ۇيىمداستىرعانداردىڭ مۇلكى تاركىلەنەدى.

ءتىپتى 7 جارىم ملن تەڭگەگە جۋىق ايىپۇل تولەيدى, نەمەسە 2 جىل باس بوستاندىعىنان ايىرىلۋى مۇمكىن. وتەلمەگەن بورىشى بار ازاماتتاردىڭ ويىنعا قاتىسۋىنا جول بەرىلمەيدى, ال تالاپتى بۇزعان بۋكمەكەرلىك كەڭسەلەر جازاعا تارتىلادى. بۇگىن ءماجىلىس ويىن بيزنەسى مەن لوتەرەيالار تۋرالى زاڭ جوباسىن ءبىرىنشى وقىلىمدا ماقۇلدادى. ەندى, وتەلمەگەن نەسيەلىك قارىزى بارلار, اليمەنت تولەمەگەندەر ءباس تىگە المايدى.

ويىن بيزنەسىنىڭ كوشە, عيماراتتارداعى سىرتقى جارناماسىنا تىيىم سالىنادى. ينتەرنەت كەڭىستىگىندە, تەلە-, راديوارنالاردا قۇمار ويىن ناسيحاتى توقتاتىلادى. بلوگەرلەر مەن الەۋمەتتىك جەلىدەگى تانىمال تۇلعالار ويىن تۇرلەرىن جارنامالاسا, ايىپپۇل ارقالايدى.  ەلنۇر بەيسەنباەۆ, قر پارلامەنتى ءماجىلىسىنىڭ دەپۋتاتى: — تيكتوك ويىندارىندا كارتا ۇيىمداسترىپ وتىرعان, وزدەرىنىڭ جەكە بانكتىك شوتتارىنا تەلەفون ارقىلى تولەمدەردى الىپ جاتقان ءاربىر ازامات زاڭ اياسىندا جاۋاپ بەرەدى. ولاردىڭ قىزمەتى زاڭسىز.

ولاردىڭ بارلىعىنىڭ قىزمەتىن توقتاتۋ مىندەتىمىز. كەز كەلگەن ويىن ءتۇرىن قۇمار ويىندارىن ۇيىمداستىرۋ ليتسەنزيالانباعان ويىن تۇرلەرىنىڭ بارلىعى قازاقستاندا زاڭسىز. ولارعا قازىر قىلمىستىق كودەكستە ارنايى باپ قاراستىرىلعان. قوماقتى ايىپپۇلدارمەن ەكى جىلعا دەيىن باس بوستاندىعىن شەكتەۋ مەرزىمى قاراستىرىلعان. وكىنىشتىسى, ەلدە ءاربىر بەسىنشى ادام قۇمار ويىنعا شىرمالعان. بۇل كەيىنگى 2 جارىم جىلدا بەلەڭ العان كەسەل. اجىراسۋلاردىڭ 40%-ى لۋدومانيانىڭ كەسىرىنەن بولىپ وتىر. ءوز-وزىنە قول جۇمساعان 3 جارىم مىڭنان استام ادامنىڭ ءاربىر بەسىنشىسى لۋدومانيانىڭ زاردابىنان سونداي قادامعا بارعان. ءتىپتى اسكەريلەر اراسىندا ويىنقۇمارلىق بەلەڭ الدى. دەپۋتاتتار ماسەلەنىڭ ارعى جاعىندا مۇددەلى توپتار, ياعني, لوببيستەردىڭ بارىن جاسىرمادى. سونداي-اق كولەڭكەلى ەكونوميكانىڭ كۇشەيۋىنە اسەرى بار.

بەيرەسمي اقپارات بويىنشا, بۋكمەكەرلىك كەڭسەلەردىڭ جىلدىق اينالىمى 1 تريلليون تەڭگەگە جەتكەن.  ەدىل جاڭبىرشين, قر پارلامەنتى ءماجىلىسىنىڭ دەپۋتاتى: — تاعى ءبىر ماڭىزدى ماسەلە — ويىن بيزنەسىنە قاتىسۋعا مەم قىزمەتشىلەر مەن قۇقىق قورعاۋ ورگاندارىنىڭ قىزمەتكەرلەرىنە زاڭمەن تىيىم سالۋ كەرەك. لۋدومانداردىڭ ول سالالاردا قىزمەت ەتۋى مەملەكەتتىڭ قاۋىپسىزدىگىنە نۇقسان كەلتىرەدى. ويىن بيزنەسى ادام بيزنەس ەمەس. اقيقاتىندا ءبىز سالدارىمەن ەمەس, سەبەبىمەن كۇرەسۋىمىز كەرەك. بولاشاقتا ويىن بيزنەسىنە زاڭمەن تولىقتاي تىيىم سالعان ءجون. ەڭ باستىسى, وسكەلەڭ ۇرپاقتى لۋدومانيا دەرتىنەن ساقتاۋ ءۇشىن ولاردىڭ رۋحاني تاربيەسىمەن جان-جاقتى اينالىسۋ وتە ماڭىزدى دەپ ەسەپتەيمىن. بۇگىندە 400 مىڭ ادام قۇمار ويىنعا سالىنىپ, كازينولاردىڭ تۇراقتى كليەنتىنە اينالىپ وتىر. لۋدومانداردىڭ قاتارىندا كامەلەتكە تولماعان 200 مىڭنان استام ءجاسوسپىرىم بار. جاڭا زاڭ كۇشىنە ەنگەن سوڭ, ەل اۋماعىندا زاڭسىز لوتەرەيا تەرمينالدارىن ورناتۋعا قاتاڭ شەكتەۋ قويىلادى. ويىنقۇمارلار 1 جىل بويى كونسۋلتاتيۆتىك باقىلاۋدا بولادى. جاعداي تۇزەلمەسە, ديسپانسەرلىك ەسەپكە الىنىپ, ەمدىك شارا قولدانىلادى.