«250 مىڭ تەڭگەگە بيلەت ساتىپ الدادى»: استانادا 5 ساۋىردە ءوتۋى ءتيىس كاسىپقوي بوكس كەشى باستالماي جاتىپ داۋعا ۇلاستى

استانادا 5 ساۋىردە ءوتۋى ءتيىس كاسىپقوي بوكس كەشى باستالماي جاتىپ داۋعا ۇلاستى. تانىمال پروموۋتەرلىك كومپانيا كورەرمەندەردى الداعان. كورەرمەندەر جارناماسى جەر جارعان سوڭ قىمبات بيلەتتەردى ساتىپ العان. الايدا,  بوكس كەشى جاقىنداعاندا اتاقتى سپورتشىلاردىڭ شارشى الاڭعا شىقپايتىنى بەلگىلى بولدى, دەپ حابارلايدى qandastar.kz Skifnews.kz-كە سىلتەمە جاساپ.

«بالاۋسا مۇزدىمان امەريكالىق ازۋلى بوكسشى روزاليندا رودريگەسپەن (14-0, 3 كو) جۇدىرىقتاسۋى ءتيىس بولعان. الايدا, ونىڭ ورنىنا ءوز ەلىنىڭ شەكاراسىنان شىعىپ كورمەگەن ءبىر فيليپپيندىك قىز كەلەتىن بولىپتى. بالاۋسا ونداي بوكسشىلاردىڭ التاۋىن ۇرىپ قۇلاتقان بۇعان دەيىن.

سونداي-اق, ماحمۇد سابىرحاننىڭ دا قارسىلاسى كەلمەيتىن بولىپتى. وعان ءالى قارسىلاس تابىلماعان. ەرتەڭ تايلاندتان نەمەسە تاعى سول فيليپپيننەن پلياج تازالاپ جۇرگەن بىرەۋدى اكەلە سالادى-اۋ دەپ بولجاپ وتىرمىن.

ءدال وسى قارقىنمەن كەتە بەرسە 5 ءساۋىر جاقىنداعاندا جانىبەكتىڭ قارسىلاسى دا كەلمەي قالا ما دەپ الاڭداپ وتىرمىن.

كاسىبي بوكس كەشى ەمەس, ناعىز قازاقي بيزنەس بولدى بۇل دا. Nomad Promotions دەگەن كومپانيا ەكەن ۇيىمداستىرىپ جاتقان. 250 مىڭ تەڭگەلىك بيلەتتەر ساتىپ, جانكۇيەرلەردى وسىلاي الداپ كەتتى. مەن بالاۋسا مەن روزاليندانىڭ جەكپە-جەگىن كۇتكەن ەدىم», — دەپ جازدى جۋرناليست سەرعالي بالاجان.