ءماجىلىس دەپۋتاتى جاناربەك ءاشىمجانوۆ, بۇگىنگى جالپى وتىرىستا, ChatGPT جاساندى ينتەللەكتىنە ارىپتەسى ەرلان سايروۆ تۋرالى ولەڭ شىعارۋدى تاپسىرعانىن ايتتى, دەپ حابارلايدى qandastar.kz اقپاراتتىق پورتالى.

بۇل ءماجىلىستىڭ “جاساندى ينتەللەكت تۋرالى” زاڭ جوباسىن ءبىرىنشى وقىلىمدا تالقىلاۋ بارىسىندا ايتىلدى.

دەپۋتات ءوزىنىڭ تاجىريبەسىمەن ءبولىسىپ, ChatGPT-گە تاپسىرما بەرىپ, سايروۆ تۋرالى ولەڭ شىعارىپ الۋ ارەكەتىن تانىستىردى. ءاشىمجانوۆتىڭ ايتۋىنشا, ول جاساندى ينتەللەكتكە سۇرانىس جىبەرىپ, وعان “ەرلان سايروۆ تۋرالى ولەڭ كەرەك. ول دەپۋتات, ساياساتكەر. شىعىس قازاقستاننىڭ تۋماسى. وليگارحتارمەن اياۋسىز كۇرەسىپ جاتىر” دەگەن تاپسىرما بەرگەن. ال جاساندى ينتەللەكت بەس شۋماق ولەڭ شىعارىپ بەردى.

«مەن ولەڭنىڭ ءبىر شۋماعىن وقىپ بەرەيىن. قازىر الەۋمەتتىك جەلىدە وسىنداي قاپتاپ جاتىر. جاساندى ينتەللەكت تۋىندىلارىنا ەشقانداي اۆتورلىق قۇقىق يەسى جوق», – دەدى دەپۋتات.

ءاشىمجانوۆ بۇل جاعدايدىڭ اۆتورلىق قۇقىق ماسەلەلەرىنە دە قاتىستى ەكەندىگىن اتاپ ءوتتى. سونىمەن بىرگە, ول جاساندى ينتەللەكت تۋىندىلارىنىڭ شىعارماشىلىق تۇلعالارعا, اقىندارعا, جازۋشىلارعا, دراماتۋرگتەرگە اسەر ەتۋى مۇمكىن ەكەنىن دە ەسكەرتتى. دەپۋتات تەحنولوگيالىق جانە ينفراقۇرىلىمدىق تۇرعىدان قاجەت ەكەندىگىنە نازار اۋدارعانىمەن, شىعارماشىلىق سالالارداعى ىقپالى تۋرالى ويلارىن ءبولىستى.