جاڭالىقتار
«3 بولمەلى پاتەر مەن 2 ملن. 684 000 تەڭگە اقشالاي تولەم»: جامبىل وبلىسى ەلدوس سمەتوۆكە قانداي سىي بەرەتىنى بەلگىلى بولدى
كوللاج jambylinfo.kz.
پاريج تورىندە توپ جارعان جامپوزعا جەرگىلىكتى بيلىك باسپانا سىيلاپ, اي سايىنعى اقشالاي جابدىقتالىم تولەمدەرىن تولەيدى.
وليمپيادا چەمپيونى اتانعان ەلدوس سمەتوۆكە جامبىل وبلىسى تاراپىنان تاراز قالاسىنان 3 بولمەلى پاتەردىڭ كىلتى تابىس ەتىلىپ, كەلەسى وليمپيادا ويىندارىنا دەيىن 727 اەك كولەمىندە اي سايىنعى اقشالاي جابدىقتالىم تولەمدەرى تولەنەدى. (بۇل شامامەن 2 ملن. 684 084 مىڭ تەڭگە), دەپ حابارلايدى Jambylinfo.kz.
بۇل تۋرالى وبلىستىق دەنە شىنىقتىرۋ جانە سپورت باسقارماسى باسشىسىنىڭ ورىنباسارى نۇرجان جولداسبەكوۆ Jambylinfo.kz. تىلشىسىنە بەرگەن سۇحباتىندا ايتتى.
«وليمپيادا چەمپيونىنا وبلىس تاراپىنان «وليمپيادالىق, پاراليمپيادالىق جانە سۋردليمپيادالىق ويىنداردىڭ چەمپيوندارى مەن جۇلدەگەرلەرىنە تۇرعىنجاي بەرۋ جانە ونى پايدالانۋ قاعيدالارىن بەكىتۋ تۋرالى» قازاقستان رەسپۋبليكاسى مادەنيەت جانە سپورت ءمينيسترىنىڭ 2020 جىلعى 20 ساۋىردەگى № 97 بۇيرىعىنا سايكەس 3 بولمەلى پاتەر بەرىلەدى. سونىمەن قاتار, 2017 جىلعى 27 قاراشاسىنداعى جامبىل وبلىسى اكىمدىگىنىڭ №262 قاۋلىسىنا سايكەس وليمپيادا ويىندارىنا دەيىن 727 اەك كولەمىندە اي سايىنعى اقشالاي جابدىقتالىم تولەمدەرى تولەنەدى», – دەدى ول.
ەسكە سالايىق, حححlll جازعى وليمپيادا ويىندارىندا قر ەڭبەك سىڭىرگەن سپورت شەبەرى, جامبىلدىق ەلدوس سمەتوۆ جەڭىسكە جەتىپ, چەمپيون اتاندى. جەرلەسىمىز تورتجىلدىقتىڭ باستى دوداسىندا 3 مارتە جۇلدە الىپ, ەل تاريحىندا دزيۋدودان وليمپيادانىڭ تۇڭعىش چەمپيونى اتانىپ وتىر.
