الەۋمەت جانە قوعامجاڭالىقتار
3 مۇعالىم قازا تاپتى: قوستانايدا جول اپاتىنا سەبەپكەر بولعان جۇرگىزۋشىگە سوت ۇكىمى شىقتى
قوستاناي وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا 3 مۇعالىمنىڭ ءومىرىن قيعان جول اپاتىنا سەبەپكەر جۇرگىزۋشىگە قاتىستى قىلمىستىق ءىس قارالدى, دەپ حابارلايدى Qandastar.kz اقپارات پورتالى.
سوتتىڭ مالىمەتىنشە, 2024 جىلدىڭ 16 جەلتوقسانىندا «قوستاناي-اۋليەكول-سۇرعان» اۆتوجولىندا سوتتالۋشى ر. «VOLVO FH12» ماركالى اۆتوكولىگىمەن كەلە جاتىپ, قارسى قوزعالىس جولاعىنا شىعىپ كەتىپ, قوستاناي قالاسى باعىتىندا كەلە جاتقان جۇرگىزۋشى س. باسقارعان «TOYOTA ALFARD» ماركالى اۆتوكولىگىمەن بەتپە-بەت سوقتىعىسقان. جول-كولىك وقيعاسى سالدارىنان «TOYOTA ALFARD» اۆتوكولىگىنىڭ ءۇش جولاۋشىسى وقيعا ورنىندا العان دەنە جاراقاتتارىنان كوز جۇمدى. ال جۇرگىزۋشى س. جانە ەكى جولاۋشى, ونىڭ ىشىندە بىرەۋى كامەلەتكە تولماعان, ءتۇرلى دەنە جاراقاتتارىن الدى.
سوت سوتتالۋشىنىڭ جەكە باسىن, جاسالعان ءىس-ارەكەتتىڭ سيپاتىن جانە قوعامدىق قاۋىپتىلىك دارەجەسىن, سونداي-اق ءىس بويىنشا بارلىق ءمان-جايلاردى ەسكەرە وتىرىپ, ر-عا جازاسىن قىلمىستىق-اتقارۋ جۇيەسىنىڭ قاۋىپسىزدىگى بارىنشا تومەن مەكەمەسىندە وتەۋمەن 5 جىلعا باس بوستاندىعىنان ايىرۋ جازاسىن تاعايىندادى, سونداي-اق 7 جىلعا كولىك قۇرالىن باسقارۋ قۇقىعىنان ايىرىلدى.
ۇكىم زاڭدى كۇشىنە ەنگەن جوق.
