3 مىڭنان استام قازاقستاندىق ايەل IT-Aiel باعدارلاماسىنا قاتىستى

فوتو: اشىق دەرەككوز

Astana Hub IT-Aiel 2.0 ءبىلىم بەرۋ باعدارلاماسىن قورىتىندىلاپ جاتىر. بۇل باعدارلاما قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا مەن «TechnoWomen» كەۇ-مەن بىرلەسىپ جۇزەگە اسىرىلۋدا. باستاما ايەلدەردىڭ تسيفرلىق داعدىلارىن دامىتۋدى كوزدەپ, ولاردىڭ IT-سالاداعى كاسىبي وسۋىنە مۇمكىندىك بەرەدى, دەپ جازدى qandastar.kz

2024 جىلدىڭ ماۋسىمىندا باستالعان جوبا ۇلكەن قىزىعۋشىلىق تۋدىرىپ, قازاقستاننىڭ بارلىق ايماعىنان 5200 ايەل جاڭا داعدىنى يگەرۋگە نيەتتەندى. ولاردىڭ ىشىندە 3084 قاتىسۋشى وقۋدى باستاپ, No-code باعدارلامالاۋ, فريلانس نەگىزدەرى, ەلەكتروندىق كوممەرتسيا مەن باسقا دا سۇرانىسقا يە داعدىلاردى بەلسەندى مەڭگەرىپ جاتىر. قازىرگى ۋاقىتتا 62 قاتىسۋشى وقۋدى ءساتتى ءتامامداپ, مانسابىن نەمەسە كاسىپكەرلىك قىزمەتىن باستاۋعا قاجەتتى ءبىلىم الدى.

باعدارلاما 18 جاستان اسقان ايەلدەردى, ونىڭ ىشىندە جۇمىسسىزداردى, دەكرەتتىك دەمالىستاعى ايەلدەردى, ستۋدەنتتەر مەن جاس كاسىپكەرلەردى قامتىدى. قاتىسۋشىلاردىڭ باسىم بولىگى استانا, الماتى قالالارى مەن الماتى جانە باتىس قازاقستان وبلىستارىنان تىركەلدى.

ەكىنشى لەكتىڭ بىرقاتار تابىستى باستامالارى بار. اتاپ ايتقاندا:

• قىزىلوردالىق ساعيليا ساعيدان EdKids اتتى ءبىلىم بەرۋ پلاتفورماسىن ازىرلەدى. بۇل رەسۋرس بالالارعا ساپالى ءبىلىم ۇسىنىپ, ەرتە جاستان باستاپ ءوز داعدىلارىن دامىتۋعا سەپتىگىن تيگىزەدى.  پلاتفورما ينتەراكتيۆتى وقىتۋعا باعىتتالعان ءارى كەڭ اۋديتورياعا قولجەتىمدى.

اقتوبەلىك اسەل قاراجان مەنتالدىق اريفمەتيكاعا باۋليتىن AKM Education مەكتەبىنىڭ سايتىن قۇراستىردى. بۇل مەكتەپ بالالار مەن جاسوسپىرىمدەردىڭ اناليتيكالىق ويلاۋىن دامىتۋعا, جادى مەن زەيىنىن جاقسارتۋعا كومەكتەسىپ, زاماناۋي وقىتۋ تاسىلدەرىن ۇسىنادى.

• استانالىق مەرۋەرت جارىلقاسىنوۆا قازاقستانداعى بيزنەس پەن ستارتاپتارعا ارنالعان گرانتتار تۋرالى اقپارات بەرەتىن «Qadam» ءموبيلدى قوسىمشاسىن ىسكە قوستى. بۇل ءونىم كاسىپكەرلەر مەن ستارتاپ يەلەرىنە قولجەتىمدى گرانتتار مەن قولداۋ باعدارلامالارى تۋرالى مالىمەتتەردى وڭاي ىزدەپ, ءوتىنىم بەرۋگە مۇمكىندىك بەرەدى.
• الماتىلىق ايدانا سەمباەۆا Telegram-دا كليەنتتەرمەن جانە قىزمەتكەرلەرمەن ءوزارا ارەكەتتەسۋدى اۆتوماتتاندىرۋعا ارنالعان چات-بوت ازىرلەدى. چات-بوت ءجيى قويىلاتىن سۇراقتارعا جاۋاپ بەرۋ, سۇراۋلاردى وڭدەۋ جانە ىشكى كوممۋنيكاتسيالار سياقتى تاپسىرمالاردى شەشىپ, بيزنەس-پروتسەستەردىڭ تيىمدىلىگىن ارتتىرادى.

ايتا كەتەيىك, 2023 جىلى IT-Aiel باعدارلاماسىنىڭ ءبىرىنشى لەگى اياسىندا قازاقستاننىڭ 17 وڭىرىنەن 2000-نان استام ايەل وقۋدان ءوتتى. 50 قاتىسۋشى ۆەب-سايتتار مەن قوسىمشالار سياقتى وزدەرىنىڭ IT-ونىمدەرىن جاساپ, مانساپتىق الەۋەتىن ەداۋىر جاقسارتتى.

IT-Aiel جوباسى تسيفرلىق ءبىلىم ايەلدەردىڭ مۇمكىندىكتەرىن كەڭەيتۋدە قۋاتتى قۇرال ەكەنىن ايشىقتاپ, ولارعا داعدىلارىن دامىتىپ, قازاقستاننىڭ IT يندۋسترياسىنا ماڭىزدى ۇلەس قوسۋىنا جول اشادى.

 انىقتاما ءۇشىن:

قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ قىزمەتى ايەلدەردى تسيفرلىق ەكونوميكاعا تارتۋ ارقىلى ولاردى ناتيجەلى جۇمىسپەن قامتۋعا باعىتتالعان. ۇلتتىق كوميسسيانىڭ قولداۋىمەن قىزدار مەن ايەلدەردى IT-سالاسىنا باۋلۋعا, ايەلدەردىڭ ستارتاپتارىن قولداۋعا باعىتتالعان «TechGirls», «IT-Aiel» سياقتى جوبالار جۇزەگە اسىرىلۋدا. 2023 جىلدىڭ ناۋرىز ايىندا نيۋ-يوركتە وتكەن بۇۇ ايەلدەر جاعدايى جونىندەگى كوميسسياسىنىڭ 67-سەسسياسىندا قازاقستاننىڭ تسيفرلاندىرۋ مەن جاڭا تەحنولوگيالاردى ايەلدەردىڭ قاتىسۋىمەن دامىتۋ سالاسىنداعى وزىق تاجىريبەسى تانىستىرىلدى.

Astana Hub – ورتالىق ازياداعى ەڭ ءىرى تەحنوپارك, ونىڭ قىزمەتى ءىت-بيزنەس ءۇشىن ەكوجۇيەنى قۇرۋعا جانە دامىتۋعا, ءىت-ماماندارىن دايىنداپ, ستارتاپ-جوبالاردى قولداۋعا باعىتتالعان. بۇگىنگى تاڭدا تەحنوپاركتە 1500-تەن استام IT-كومپانيا تىركەلگەن, ونىڭ ىشىندە 400-دەن استامى شەتەلدىكتەردىڭ قاتىسۋىمەن. ولارعا بيزنەستى دامىتۋ جانە ماسشتابتاۋ باعدارلامالارى, ارنايى سالىقتىق جانە ۆيزالىق شارتتار, اقپاراتتىق-ءبىلىم بەرۋ, ماتەريالدىق ينفراقۇرىلىم جانە تاعى باسقا قولداۋ كورسەتىلەدى.

«TechnoWomen» كوممەرتسيالىق ەمەس ۇيىمى 2022 جىلدان بەرى اقپاراتتىق تەحنولوگيالار جانە باسقا دا تەحنولوگيالىق سالالاردا قىزدار مەن ايەلدەردىڭ سانىن كوبەيتۋ باعىتىندا جۇمىس ىستەپ كەلەدى. ۇيىم ايەلدەر كوشباسشىلىعىن بەلسەندى قولداپ, دامىتادى. ونىڭ قىزمەتى يندۋسترياداعى جاعدايدى وزگەرتىپ, بارلىق قاتىسۋشىلارعا تەڭ مۇمكىندىكتەر جاساۋعا باعىتتالعان.